ཐོན་མིའི་ཕྱག་རྒྱུན་ཞེས་པའི་བོད་ཡིག་ཡིག་གཟུགས་འགྲན་བསྡུར་ཆེ་མོ་སྤེལ་རྒྱུའི་བརྡ་ཐོ།

དུས་ཚོད། 2017-01-01 རྩོམ་པ་པོ རྩོམ་སྒྲིག

རྒྱ་ཆེའི་ཡིག་མཁན་རྣམ་པ།

བོད་ཡིག་ཡིག་གཟུགས་ནི་ལོ་རྒྱུས་ཀྱི་དུས་ཡུན་རིང་ཞིང་།  རིག་གནས་ཀྱི་དོན་སྙིང་ཟབ་ལ་སྒྱུ་རྩལ་གྱི་ཉམས་འགྱུར་ཕུན་སུམ་ཚོགས་པོ་བཅས་ལྡན་པའི་ཡིག་རིགས་ཤིག་ཡིན། བོད་རང་སྐྱོང་ལྗོངས་དབུ་བརྙེས་ནས་ལོ་༥༠འཁོར་བའི་དུས་སྟོན་ལ་རྟེན་འབྲེལ་ཞུ་ཆེད།  བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ཡོན་ལྷན་ཁང་གཞུང་ལས་ཁང་གིས་གཙོ་གཉེར་དང་། བོད་ལྗོངས་ཡིག་གཟུགས་མཁས་པའི་མཐུན་ཚོགས་དང་བོད་ལྗོངས་ལོ་ཙྰ་བའི་མཐུན་ཚོགས་གཉིས་ཀྱིས་གཞོགས་འདེགས་ཀྱིས་ཐོན་མིའི་ཕྱག་རྒྱུན་ཞེས་པའི་ཡིག་གཟུགས་འགྲན་བསྡུར་ཆེ་མོ་སྤེལ་རྒྱུ་ཡིན་པས་དེ་དོན་བརྡ་ཐོ་གཏོང་རྒྱུ་གཤམ་གསལ།

 

གཅིག   ཡིག་གཟུགས་འགྲན་ཞུགས་ཀྱི་ཁྱབ་ཁོངས་དང་ནང་དོན།

ཐོན་མིའི་ཕྱག་རྒྱུན་ཞེས་པའི་བོད་ཡིག་ཡིག་གཟུགས་འགྲན་བསྡུར་ནི་བོད་ཡིག་དབུ་ཅན་དང་དབུ་མེད་གཉིས་ཀྱི་འབྲི་གཟུགས་འགྲན་རྒྱུ་ཡིན་ཞིང་། བོད་རང་སྐྱོང་ལྗོངས་སུ་འཚོ་སྡོད་དང་ཕྱག་ལས་གནང་མཁན་མི་རིགས་དབྱེ་མེད་དང་བོད་ཡིག་ལ་དང་ཞེན་གནང་མཁན་ཅི་རིགས་ཞུགས་ཆོག འགྲན་ཞུགས་ཡིག་གཟུགས་ཀྱི་ནང་དོན་དེ། བོད་རང་སྐྱོང་ལྗོངས་དབུ་བརྙེས་ནས་ལོ་༥༠འཁོར་བར་རྟེན་འབྲེལ་ཞུ་བ་དང་། བོད་ཀྱི་དཔལ་འབྱོར་གོང་འཕེལ།  སྤྱི་ཚོགས་བརྟན་ལྷིང་།  བོད་ལྗོངས་གསར་པ།  འཚོ་བ་གསར་པ་སོགས་ལ་བསྔགས་པའི་ལེགས་ལྡན་ཡར་ཐོན་གྱི་རིགས་དགོས།

 

གཉིས།   བྱ་དགའ།

འགྲན་བསྡུར་གྱི་ཡིག་ཁོངས་སུ་དབུ་ཅན་དང་།  འབྲུ་ཚ།  ཚུགས་ཐུང་། འཁྱུག  དཔེ་ཚུགས།  སྒྱུ་རྩལ་ཡི་གེ་བཅས་ཡིག་སྣ་ཁག་དྲུག་ཡོད་ཅིང་། ཡིག་གཟུགས་རེར་བྱ་དགའ་རིམ་པ་དང་པོ་༡དང་། གཉིས་པ་༢ གསུམ་པ་༣ དེ་བཞིན་ཕུལ་བྱུང་གི་བྱ་དགའ་འགའ་ཞིག་བཅས་དཔྱད་འདེམས་བྱ་རྒྱུ་ཡིན།

 

གསུམ།   བརྩམ་ཆོས་ཀྱི་གཟབ་བྱ།

བདམས་ཐོན་བྱུང་བའི་ཡིག་གཟུགས་དེ་རྣམས་ཕྱོགས་བསྒྲིགས་ཀྱིས་དཔེ་སྐྲུན་བྱེད་འཆར་ཡོད་སྟབས་འགྲན་ཞུགས་ཡིག་གཟུགས་རྣམས་དངོས་གཙང་ལ་རལ་ཧྲུལ་མེད་ཁར། ཤོག་ངོས་ཆུང་ཤོས་ལ་ཞེང་དཔངས་ལིའི་རྨིད་༤༠×༦༠ཡིན་པ་དང་། ཆེ་ཤོས་ལ་ཞེང་དཔངས་ལིའི་རྨིད་༦༠×༩༠ཡིན་པའི་བོད་ཤོག་གམ་རྒྱ་ཤོག་གང་རུང་ཐོག་བྲིས་ན་འགྲིག་ལ་བརྩམ་ཆོས་གཅིག་གི་ནང་ཡིག་གཟུགས་སྣ་རིགས་གཅིག་ལས་འབྲི་མི་ཆོག་པ་དང་།  བརྩམ་བྱའི་ངོས་སུ་ཡིག་མཁན་གྱི་མིང་ཐམ་བཀོད་ཆོག  གཞན་ཡང་ཡིག་མཁན་གྱི་མིང་དང་། ལས་ཁུངས།   འབྲེལ་གཏུགས་བྱ་སྟངས་སོགས་བརྩམ་བྱའི་རྒྱབ་ངོས་སུ་ཁ་གསལ་འབྲི་དགོས། 

 

བཞི།   དཔྱད་འདེམས།

ད་ཐེངས་ཀྱི་འགྲན་བསྡུར་འདི་དྲང་བདེན་དྲང་བཞག་ཡོང་ཆེད། ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་མཁས་དབང་གདན་དྲངས་ཏེ་གཅིག་གྱུར་ཐོག་དཔྱད་འདེམས་བྱ་རྒྱུ་ཡིན་པ་བྱ་དགའ་ཐོབ་པའི་བརྩམ་བྱ་དེ་ཕྱིར་སྤྲོད་བྱེད་རྒྱུ་མིན་ཞིང་དེའི་དཔར་དབང་ཡིག་གཟུགས་འགྲན་བསྡུར་གཉེར་མཁན་ཚན་པར་བདག་པ་ཡིན།   

 

ལྔ།    བྱ་དགའ་སྤྲོད་པའི་དུས་ཚོད་དང་འགྲེམས་སྟོན་གྱི་དུས་ཚོད།

ཟླ་༨པའི་ནང་ལྗོངས་མང་ཚོགས་སྒྱུ་རྩལ་ཁང་དུ་ཡིན། 

 

དྲུག   བརྩམ་བྱ་བསྡུ་མཚམས་འཇོག་པའི་དུས་ཚོད་དང་སྐུར་ཡུལ།

འགྲན་ཞུགས་ཡིག་གཟུགས་རྣམས་ཟླ་༦པའི་ཚེས་༣༠གོང་དུ་བསྐུར་གནང་ཡོད་པ་མཁྱེེན། །

སྐུར་ཡུལ།  ལྷ་ས་གྲོང་ཁྱེར་ཁྲེང་ཀོན་ཆུས་མཁར་སྣ་གདོང་ལམ་སྒོ་རྟགས་ཨང་དང་པོ།  བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ཡོན་ལྷན་ཁང་གཞུང་ལས་ཁང་«བོད་སྐད་ཡིག་ལས་དོན་»རྩོམ་སྒྲིག་ཁང་།   

 

 

 

འབྲེལ་གཏུགས་བྱེད་མི།   ལྷ་དབང་།

ཁ་པར་ཨང་གྲངས།         0891―6334142―8304    18289115787

 

 

 

 

   བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ཡོན་ལྷན་ཁང་གཞུང་ལས་ཁང་ནས།

༢༠༡༥ལོའི་ཟླ་༥ཚེས་༢༠ཉིན།