༄༅། ། ལྕགས་ཀྱི་བསྟན་བཅོས།
ལྕགས་ལ་ངར་ནི་ཆེར་མི་འབྱུང་།།
ལེགས་བཤད་ཅུང་ཟད་ཐོས་ཙམ་གྱིས།།
སེམས་ལ་དད་པ་གཏིང་སྐྱེས་དཀའ།།
ཐོ་བ་ནམ་མཁར་འདེགས་པ་ན།།
ལྕི་ཡང་ལག་པས་འཇལ་བར་བྱེད།།
རྒྱལ་བའི་གསུང་མཛོད་ལེགས་བཤད་ལ།།
ཕྲ་ཞིབ་རིག་པས་བརྟག་དཔྱད་བྱ།།
རྣོ་ཡང་ཁབ་ལ་བུ་ག་མེད།།
སྐུད་པ་རྗེས་སུ་འདྲེན་མི་ནུས།།
བློ་ལྡན་སྙིང་རྗེ་མེད་པ་ན།།
གདུལ་བྱ་རྗེས་སུ་འཁྲིད་མི་ནུས།།
ཁབ་ལམ་དྲངས་པའི་སྐུད་པ་དེ།།
ཅི་ནས་དྲང་པོ་འོང་བ་ལྟར།།
བསྟེན་སའི་བཤེས་གཉེན་མ་ནོར་ན།།
བློ་ཁ་རིམ་གྱིས་བདེ་བར་དཀྲི།།
རྡོ་དང་ལྕགས་གཉིས་འཕྲད་པས་ན།།
མེ་སྟག་འབྱུང་བ་ཤིན་ཏུ་སླ།།
དད་བརྩོན་ཚོགས་པའི་བླ་སློབ་ཟུང་།།
ཡོན་ཏན་སྐྱེ་བར་ཐེ་ཚོམ་མེད།།
ལྕགས་ཀྱི་གདུང་མ་སྦོམ་ན་ཡང་།།
བརྩོན་པས་བརྡར་བས་རིམ་གྱིས་གཅོད།།
མི་ཤེས་དྲ་བ་དཔུང་མཐུག་ཀྱང་།།
ཐོས་ལ་བརྩོན་པས་རིམ་གྱིས་གཞོམ།།
ལེ་ལོ་སྤངས་པའི་བརྩོན་འགྲུས་ཀྱིས།།
ལེགས་ལམ་གང་བརྩམས་མཐར་ཐོན་བྱེད།།
ལྕགས་ཀྱི་རྐང་སྟེགས་འཕྲུལ་སྤྱད་ལ།།
བརྟེན་པས་ཐང་ཆེན་མྱུར་བར་བགྲོད།།
གདུལ་བྱའི་དོན་སྤྱོད་ལ་ཞུགས་ཚེ།།
དགའ་དང་ཕན་ཚུན་འགྲན་བཞིན་དགོས།།
གསེར་དངུལ་འདྲེན་འདོད་ཤིང་རྟ་ལ།།
ལྕགས་ཀྱི་གཟེར་མིག་ཟུང་འབྲེལ་གཅེས།།
སྟོབས་ལྡན་ལག་པས་རབ་བཟུང་བའི།།
རྣོ་ངར་སྤུ་གྲིས་འཁྲི་ཤིང་གཅོད།།
གཞི་ནས་བརྟན་པའི་ཤེས་རབ་ཀྱི།།
རལ་གྲིས་མཐར་འཛིན་དྲ་བ་གཅོད།།
རྣོ་ངར་ལྡན་པའི་ལྕགས་ཀྱི་མདའ།།
འབེན་གྱི་གཏིང་ལ་ཐུག་པ་ལྟར།།
ཆོས་ཉིད་མངོན་གཟིགས་ཡེ་ཤེས་ཀྱིས།།
ཡུལ་གྱི་གནས་ཚུལ་ཇི་བཞིན་གཟིགས།།
རལ་གྲིས་སྟོབས་ཀྱིས་དགྲ་ལས་རྒྱལ།།
རལ་གྲི་མགར་བའི་དྲིན་ལས་བྱུང་།།
ཐུབ་པའི་ལེགས་བཤད་རྨད་བྱུང་རྣམས།།
ཐམས་ཅད་བླ་མའི་དྲིན་ལས་བྱུང་།།
དགྲ་ཀུན་མང་སར་ནོར་ལས་ཀྱང་།།
གོ་ཁྲབ་མཚོན་ཆ་གཅེས་སྤྲས་དགོས།།
སྙིགས་དུས་རྐྱེན་ངན་རུ་འཛིངས་སྐབས།།
བྱི་དོར་སེམས་ལ་བྱ་བ་གཅེས།།
