དམངས་གཞས་ཀྱི་གཞས་ཚིག་ཁག་གཉིས།
སྣེ་གདོང་གོང་པོ་རི།
སྣེ་གདོང་གོང་པོ་རི་ཡི་རྩེ་མོ་རུ།།
ཤིང་དེ་ཨ་ཀྱོག་བ་ཀྱོག་ཤིང་གཅིག་འདུག།
ཤིང་དེ་ཨ་ཀྱོག་བ་ཀྱོག་ཤིང་གི་སྟེང་།།
བབས་པའི་བྱེའུ་ཆུང་གསེར་བྱ་ཆ་གཅིག་འདུག།།
གསེར་བྱ་ང་གཉིས་མི་སྡོད་ལྷ་སར་འགྲོ།།
ལྷ་སའི་ཇོ་བོ་ཆེན་པོར་གསེར་གཤོག་སྒྲོན།།
སྣེ་གདོང་གོང་པོ་རི་ཡི་སྐེད་པ་རུ།།
ཤིང་དེ་ཨ་ཀྱོག་བ་ཀྱོག་ཤིང་གཅིག་འདུག།
ཤིང་དེ་ཨ་ཀྱོག་བ་ཀྱོག་ཤིང་གི་སྟེང་།།
བབས་པའི་བྱེའུ་ཆུང་གཡུ་བྱ་ཆ་གཅིག་འདུག།
གཡུ་བྱ་ང་གཉིས་མི་སྡོད་ལྷ་སར་འགྲོ།།
ལྷ་སའི་དཔལ་ལྡན་ལྷ་མོར་གཡུ་གཤོག་སྒྲོན།།
སྣེ་གདོང་གོང་པོ་རི་ཡི་རྩ་བ་རུ།།
ཤིང་དེ་ཨ་ཀྱོག་བ་ཀྱོག་ཤིང་གཅིག་འདུག།
ཤིང་དེ་ཨ་ཀྱོག་བ་ཀྱོག་ཤིང་གི་སྟེང་།།
བབས་པའི་བྱེའུ་ཆུང་དུང་བྱ་ཆ་གཅིག་འདུག།
དུང་བྱ་ང་གཉིས་མི་སྡོད་ལྷ་སར་འགྲོ།།
ལྷ་སའི་གསེར་འབྲས་དགའ་ལ་ཚོགས་དུང་འབུལ།།
འབྲས་སྤུངས།
དགའ་ལྡན་དབུ་འཕང་མཐོ་བ།།
འབྲས་སྤུངས་མཐོང་གསལ་ཆེ་བ།།
འབྲས་སྤུངས་གསེར་གྱི་འབྲས་སྤུངས།།
གནས་ཆུང་གཡུ་ཡི་གཞོང་པ།།
གནས་ཆུང་སྐྱིད་པོའི་དབུ་ལ།།
རྒོད་པོས་ལྡིང་སྐོར་རྒྱག་གིས།།
ལྕང་མ་སྦྱར་པའི་བར་ལ།།
བྱེའུ་ཆུང་གསུང་སྐད་སྙན་པ།།
རྒན་རྒོན་སྐོར་བ་རྒྱག་ས།།
གནས་ཆེན་ཆོས་འཁོར་ལྷ་ས།།
གཞོན་གཞོན་ཁྲུང་མ་རྒྱག་ས།།
སྐྱིད་པོའི་རྫོང་རྒྱབ་ཀླུ་ཁང་།།
ཕྱག་དང་མཆོད་པ་འབུལ་ས།།
གནས་མཆོག་གཙུག་ལག་ཁང་ཆེན།།
གསོལ་བ་སྨོན་ལམ་འདེབས་ས།།
ཇོ་བོ་ཐུགས་རྗེ་ཆེན་པོ།།
