ཚངས་དབྱངས་རྒྱ་མཚོའི་མགུར་གླུ།

དུས་ཚོད། 2018-02-28 རྩོམ་པ་པོ སྐྱིད་ལུས། རྩོམ་སྒྲིག ཚངས་དབྱངས་རྒྱ་མཚོ།

༢༠ དག་པ་ཤེལ་རིའི་གངས་ཆུ།། ཀླུ་བདུད་རྡོ་རྗེའི་ཟིལ་བ།།

བདུད་རྩི་སྨན་གྱི་ཕབ་རྒྱུན།། ཆང་མ་ཡེ་ཤེས་མཁའ་འགྲོ།

དམ་ཚིག་གཙང་མས་བཏུང་ན།། ངན་སོང་མྱོང་དགོས་མིན་འདུག།

༢༡རླུང་རྟ་ཡར་འགྲོའི་དུས་ལ། རླུང་བསྐྱེད་དར་ལྕོག་བཙུགས་པས།

མཛངས་མ་མ་བཟང་བུ་མོས། ང་རང་མགྲོན་པོ་བོས་བྱུང་།

༢༢ སོ་དཀར་ལྤགས་པའི་འཛུམ་མདངས། བཞུགས་གྲལ་སྤྱི་ལ་བསྟན་ཀྱང་།

མིག་ཟུར་ཁྲ་མོའི་སྒྲིལ་མཚམས། གཞོན་པའི་གདོང་ལ་བལྟས་བྱུང་།

༢༣ ཧ་ཅང་སེམས་ལ་སོང་ནས། འགྲོགས་འདྲིས་ཨེ་ཡོང་དྲིས་པས།

འཆི་བྲལ་བྱེད་ན་མིན་པ། གསོན་བྲལ་མི་བྱེད་གསུང་བྱུང་།

༢༤ མཛངས་མའི་ཐུགས་དང་བསྟུན་ན། ཚེ་འདིའི་ཆོས་སྐལ་ཆད་འགྲོ།

དབེན་པའི་རི་ཁྲོད་འགྲིམས་ན། བུ་མོའི་ཐུགས་དང་འགལ་འགྲོ།

༢༥ ཀོང་ཕྲུག་གཞོན་པའི་བློ་སྣ། སྦྲང་བུ་རྒྱ་ལ་བཅུག་འདྲ།

ཞག་གསུམ་ཉལ་རོགས་བྱས་པས། ཕུགས་ཡུལ་ལྷ་ཆོས་དྲན་བྱུང་།

༢༦ གཏན་གྲོགས་ཁྱོད་ལ་སེམས་པའི། ཁྲེལ་དང་ངོ་ཚ་མེད་ན།

མགོ་ལ་བརྒྱབ་པའི་གཙུག་གཡུས། སྐད་ཆ་སྨྲ་ནི་མི་ཤེས།

༢༧འཛུམ་དང་སོ་དཀར་སྟོན་ཕྱོགས། གཞོན་པའི་བློ་བྲིད་ཡིན་འདུག

སྙིང་ནས་ཤ་ཚ་ཡོད་མེད། དབུ་མནའ་བཞེས་རོགས་གནང་དང་།

༢༨ སྙིང་ཐུབ་བྱ་རྡོ་ལམ་འཕྲད། ཨ་མ་ཆང་མས་སྦྱར་བྱུང་།

ལན་ཆགས་བུ་ལོན་བྱུང་ན། འཚོ་སྐྱོང་ཁྱོད་རས་གནང་ཞུ།

༢༩ སྙིང་གཏམ་ཕ་མར་མ་བཤད། ཆུང་འདྲིས་བྱམས་པར་བཤད་པས།

བྱམས་པ་ཤ་ཕོ་མང་ནས། གསང་གཏམ་དགྲ་བོས་གོ་སོང་།

༣༠སྙིང་ཐུབ་ཡིད་འཕྲོག་ལྷ་མོ། རྔོན་པ་ང་རས་ཟིན་ཀྱང་།

དབང་ཆེན་མི་ཡི་དཔོན་པོ། ནོར་བཟང་རྒྱལ་པོས་ཕྲོགས་སོང་།

༣༡ ནོར་བུ་རང་ལ་ཡོད་དུས། ནོར་བུའི་ནོར་ཉམས་མ་ཆོད།

ནོར་བུ་མི་ལ་ཤོར་དུས། སྙིང་རླུང་སྟོད་ལ་འཚངས་བྱུང་།

༣༢ རང་ལ་དགའ་བའི་བྱམས་པ། གཞན་གྱི་འདུན་མར་བླངས་སོང་།

ཁོག་ནད་སེམས་པའི་གཅོང་གིས། ལུས་པོའི་ཤ་ཡང་བསྐམས་སོང་།

༣༣ སྙིང་ཐུབ་རྐུ་ལ་ཤོར་སོང་། མོ་ཕྱྭ་རྩི་འབུལ་རན་སོང་།

བུ་མོ་དུང་སེམས་ཅན་མ། རྨི་ལམ་ལ་ཡང་འཁོར་བྱུང་།

༣༤ བུ་མོར་འཆི་བ་མེད་ན། ཆང་ལ་འཛད་པ་མི་འདུག

གཞོན་པའི་གཏན་གྱི་སྐྱབས་གནས། འདི་ལ་བཅོལ་བས་ལོས་ཆོག

༣༥ བུ་མོ་ཨ་མར་མ་སྐྱེས། ཁམ་བུའི་ཤིང་ལ་སྐྱེས་སམ།

ཨ་གསར་ཟད་པ་ཁམ་བུའི། མེ་ཏོག་དེ་ལས་མགྱོགས་པ།

༣༦ བུ་མོ་ཆུང་འདྲིས་བྱམས་པ། སྤྱང་ཀིའི་རིགས་རྒྱུད་མིན་ནམ།

ཤ་འདྲིས་ལྤགས་འདྲིས་བྱུང་ཡང་། རི་ལ་ཤོར་གྲབས་མཛད་གིས།

༣༧ རྟ་རྒོད་རི་ཡར་བརྒྱབ་པ། རྙི་དང་ཞགས་པས་ཟིན་གྱི།

བྱམས་པས་ངོ་ལོག་བརྒྱབ་པས། ཐུགས་ངོ་ཟིན་པ་མི་འདུག

༣༨བྲག་དང་རླུང་པོ་བསྡེབས་ནས། རྒོད་པོའི་སྒྲོ་ལ་གཟན་བྱུང་།

གཡོ་ཅན་རྫུ་བག་ཅན་གྱིས། ང་ལ་གཟན་པོ་བྱས་བྱུང་།

༣༩ སྤྲིན་པ་ཁ་སེར་གཏིང་ནག སད་དང་སེར་བའི་གཞི་མ།

བན་དྷེ་སྐྱ་མིན་སེར་མིན། སངས་རྒྱས་བསྟན་པའི་དགྲ་བོ།

༤༠ ས་དེ་ཁ་ཞུར་གཏིང་འཁྱགས། རྟ་ཕོ་གཏོང་ས་མ་རེད།

གསང་གྲོགས་བྱམས་པའི་ཕྱོགས་ལ། སྙིང་གཏམ་བཤོད་ས་མ་རེད།

ཚངས་དབྱངས་རྒྱ་མཚོའི་མགུར་གླུའི་ཐད་བཞེད་ཚུལ་མི་འདྲ་བ་མང་བ་དང་ལྷག་ཏུ་དམངས་ཁྲོད་ཀྱི་གླུ་གཞས་དང་མགུར་གླུ་བསྲེས་པ། མགུར་གླུ་རྫུན་བཟོ་བྱེད་པ་བཅས་ཀྱི་གནས་ཚུལ་ཅུང་མང་བས། དོན་དུ་མགུར་གླུའི་ཞིབ་ཕྲའི་ཁ་གྲངས་ཀྱི་ཐོག་ལའང་རྙོག་འཛིང་ཆེ་བར་གནས་ཡོད། དེས་ན་འདིར་བཀོད་པ་ནི་ལྷ་སར་ཡོད་པའི་ཤིང་པར་གྱི་མ་གཞི་བྱས་པའི་མགུར་གླུ་ཤོ་ལོ་ཀ་དྲུག་ཅུ་རེ་ལྔའི་ནང་གསེས་ཡིན།  ལེ་ཚན་རྗེས་མར་འཕྲོ་མ་རྣམས་མུ་མཐུད་འགོད་རྒྱུ་ཡིན།