གཙང་རོང་རིན་སྤུངས་ཁུལ་གྱི་མགུལ་དར་གྱི་བཤད་པ།

དུས་ཚོད། 2018-04-17 རྩོམ་པ་པོ ཉི་མ་དོན་གྲུབ། རྩོམ་སྒྲིག དམངས་ཁྲོད།

༡ བུའི་དར་གྱི་བཤད་པ།

སྔོན་དུས་ཚོང་དཔོན་ནོར་བུ་བཟང་པོ་ཡིས།།

རྒྱ་ནག་བཀྲ་ཤིས་ཁྲི་སྐོར་ནས་གདན་དྲངས་པའི།།

རྒྱ་དར་དྲི་མེད་དཀར་གཙང་འདི།།

ཡ་གིའི་གནམ་ལ་འཕྱར་ཙ་ན།།

ནམ་མཁའ་འཇའ་ཡིས་ཁེངས་པའི་གཏམ་ཞིག་བྱུང་།།

མར་ས་གཞི་མར་ལ་འཕྱར་ཙ་ན།།

ས་གཞི་ནོར་གྱིས་ཁེངས་པའི་རྟེན་འབྲེལ་བྱུང་།།

བར་བཞུགས་གྲལ་འདི་ལ་འཕྱར་ཙ་ན།།

བཞུགས་གྲལ་སྣང་བ་སྤྲོ་བའི་རྟེན་འབྲེལ་བྱུང་།།

རྒྱ་དར་དྲི་མེད་རབ་དཀར་འདིར།།

ཕྱི་ལ་བཀྲ་ཤིས་རྟགས་བརྒྱད་ཡོད།།

ནང་ལ་བཀྲ་ཤིས་རྫས་བརྒྱད་ཡོད།།

བར་དུ་གཡུ་འབྲུག་ཁ་སྦྱོར་ཡོད།།

རྒྱ་དར་དྲི་མེད་རབ་དཀར་འདིར།།

མ་ཚང་མ་འཐུས་གཅིག་ཀྱང་མེད།།

དེ་རིང་ལྷ་སྲས་ཉིད་དང་འདྲ་བ་ཁྱེད་ཀྱི་མགུལ་ལ་འབུལ་ལོ།།

ན་མོ་ཀི་ཀི་སོ་སོ་ལྷ་རྒྱལ་ལོ།

༢ བུ་མོའི་དར་གྱི་བཤད་པ།

ཨོ་སྭོ་སྟི། བདེ་ལེགས་སུ་གྱུར་ཅིག།

གནས་ནོར་འཛིན་ཡངས་པའི་ཁྱིམ་འཛིན་མ།།

སྲས་མོ་ཁྱེད་ནི་མི་ཡི་བུ་མོ་མ་ཡིན་པར།།

ལྷ་ཡི་སྲས་མོ་ཡིན་པར་འདུག།

བརྒྱ་ཡི་དཀྱིལ་ནས་བདམས་པ་ཡིན།།

སྟོང་གི་དཀྱིལ་ནས་སྒྲུག་པ་ཡིན།།

བརྒྱ་སྟོང་གཉིས་ཀྱི་ཁྲི་ལ་བསྐྱོན།།

གཙོ་ཆེན་ཡབ་ཡུམ་གཉིས་ལ་གུས་ཞབས་དགོས།

རོགས་ཚེ་གྲོགས་བར་ལ་བསྟུན་མཁས་དགོས།

ཕར་སྤྱན་མིག་དཀྲིག་ཁའི་སྐྱེལ་མ་དགོས།།

ཚུར་སོ་དཀར་མཛུམ་གྱི་བསུ་བ་དགོས།།

གཡོག་རྒན་རྣམས་ལ་སྐུལ་མཁས་དགོས།།

གཡོག་གཞོན་པ་རྣམས་ལ་བྱམས་སྐྱོང་དགོས།།

སྲས་མོ་ཁྱེད་དང་དཔོན་པོའི་ཆིབས་སྒ་འདྲ།།

དགོང་མོ་ཕྱི་བའི་ཕྱི་རུ་འདྲ།།

སྔ་དྲོ་སྔ་བའི་སྔ་རུ་འདྲ།།

ཁྱག་པ་ཆེ་བའི་སོ་ཕག་འདྲ།།

འདི་ནི་དྲིན་ཆེན་ཕ་མའི་བསླབ་བྱ་ཡིན།།

རྒྱ་དར་དྲི་མེད་རབ་དཀར་འདི།།

མ་ཚང་མ་འཐུས་གཅིག་ཀྱང་མེད།།

བུ་གསུམ་པ་པང་དུ་ལེན་པའི་རྟེན་འབྲེལ་གྱི་མགུལ་དར་འབུལ་ལོ།།

ན་མོ་ཀི་ཀི་སོ་སོ་ལྷ་རྒྱལ་ལོ།།

༣ ཡབ་ཀྱི་མགུལ་དར་བཤད་པ།

ཨོ་སྭོ་སྟི། བདེ་ལེགས་སུ་གྱུར་ཅིག།

ཡབ་ཆེན་ཁྱེད་ནི་སྲིད་པའི་གངས་རི་འདྲ།།

དེ་ལ་གངས་ཕྲན་གཞན་གྱི་འདྲེས་པ་མེད།།

གངས་དེ་ལ་གངས་སེང་ཆ་གཅིག་འཁོར་ནས་བྱུང་།།

སེང་གེ་དེ་ལ་གཡུ་རལ་རྒྱས་ནས་བྱུང་།།

ན་མོ་ཀི་ཀི་སོ་སོ་ལྷ་རྒྱལ་ལོ།།

༤ ཡུམ་གྱི་མགུལ་དར་བཤད་པ།

ཨོ་སྭོ་སྟི། བདེ་ལེགས་སུ་གྱུར་ཅིག།

ཡུམ་ཆེན་ཁྱེད་དང་མ་ཕམ་གཡུ་མཚོ་འདྲ།།

དེ་ལ་ཆུ་ཕྲན་གཞན་གྱི་འདྲེས་པ་མེད།།

མཚོ་དེ་ལ་གསེར་ཉ་ཆ་གཅིག་འཁོར་ནས་བྱུང་།།

གསེར་ཉ་དེ་ལ་གསེར་གཤོག་རྒྱས་ནས་བྱུང་།།

ན་མོ་ཀི་ཀི་སོ་སོ་ལྷ་རྒྱལ་ལོ།།

རིན་སྤུངས་ཁུལ་གྱི་དམངས་ཁྲོད་རྩོམ་རིག་ལེགས་བསྡུས་ཞེས་པ་ལས་བཏུས།