མི་བུ་རེ་ལ་ཁ་ཡི་མཚོན་ཆ་རེ།།
མི་བུ་རེ་ལ་ཁ་ཡི་རྒྱན་ཆ་རེ།།
མི་བཟང་ཁ་ནས་ལེགས་བཤད་ལྷང་སེ་ལྷང་།།
མི་ངན་ཁ་ནས་དམོད་མོ་དིར་སེ་དིར།།

ཀུན་ལ་གནོད་པའི་དམོད་མོ་བོར་ཡང་ཁ།།
ཀུན་ལ་སྨན་པའི་ལེགས་བཤད་གླེང་ཡང་ཁ། །
ཁ་ནས་བཤད་པའི་ཚིག་ལ་དོན་མེད་ན།།
ཁ་ནས་ཇི་ཙམ་བཤད་ཀྱང་སྟོང་པ་ཡིན།།

ཁ་ནས་རྩོད་ཀྱང་བདེན་པ་ཁ་ལ་མེད།།
ཁ་ནས་བཤད་ཀྱང་ཁ་རང་ངལ་བའི་རྒྱུ།།
ཁ་ནི་ཉེས་པ་ཁ་མཆུ་རྡུང་རེས་རྒྱུ།།
ཁ་ནས་ཅི་ཤོད་རང་གིས་ཚོད་འཛིན་བྱ།།

ཁ་དང་ཁ་ཡིས་གཡོ་རྫུན་ཁྲིད་པ་མང་།།
ཁ་དང་ཁ་ཡིས་འཁྲུག་རྩོད་སློང་བ་མང་།།
ཁ་ངན་ཚིག་ངན་རང་གི་མཐོང་ཡང་གཅོག།
རང་གི་ཁ་ལ་རང་གིས་བདག་པོ་རྒྱོབ།།

ཁ་དང་ཁ་ཡིས་དགེ་སློབ་མཛའ་མཐུན་སྦྲེལ།།
ཁ་དང་ཁ་ཡིས་གོང་འོག་སྦྲེལ་ཟམ་བསྐྲུན།།
འོས་འཚམ་ཁ་དེ་ཀུན་དང་མཐུན་པའི་གཞི།།
ཚོད་མེད་ཁ་དེ་ལུང་པ་དཀྲུག་པའི་རྒྱུ།།

ཁ་འཇམ་སེམས་བཟང་བཟའ་ཚང་མཐུན་ཁ་འགྲིག།
ཁ་ངན་སེམས་ངན་ཁྱིམ་ཁང་རབ་ཏུ་འཁྲུག།
ཕྱུག་པའི་ནོར་ལས་ཁ་འཇམ་སེམས་མཐུན་དགའ།།
ཞེས་པ་དེང་གི་མི་བུ་མང་པོས་གླེང་།།

ཁ་དང་ཁ་ཡིས་དཀྲོག་གཏམ་བཟོས་པ་མང་།།
ཁ་དང་ཁ་ཡིས་ཡིད་ཆེས་བརླགས་པ་མང་།།
ཁ་དང་ཁ་ཡིས་མི་ཚེ་ཕུང་བ་མང་།།
ཁ་དང་ཁ་ཡིས་དུས་ཚོད་བསྐྱལ་བ་མང་།།

ཁ་ནས་འཆད་རྒྱུ་སེམས་ནས་དྲན་ཚད་མིན།།
ཁ་ཡི་འཇོན་ཐང་དཀར་ནག་ལྡོག་རྒྱུ་མིན།།
ཁ་མཁས་ཚིག་སྙན་སྤྲེལ་ལད་མང་དྲགས་པ།།
ཁ་སྐྱེངས་ངོ་ཚའི་གནས་སུ་ལྷུང་ཉེན་ཆེ།།

ཁ་དང་ཁ་ཡི་བར་ན་གསང་བ་མང་།།
ཁ་ཡི་གསང་བ་ཁ་ཡིས་བསྲུང་བར་བྱ།།
གཞན་གྱི་གསང་བ་དོན་མེད་ཤོད་མཁན་ཚོར།།
ཁ་མང་ཡོག་དཀྲུག་ཡིན་ཞེས་གནའ་ནས་སྨྲ།།

སེམས་བཟང་ཁ་དེ་ནམ་མཁའ་ཡིན་ཡང་ཆུང་།།
སེམས་ངན་ཁ་དེ་ཙི་ཁུང་ཡིན་ཡང་ཆེ།།
བདེན་པའི་ཁ་ལ་ཀུན་གྱིས་ཉན་པར་བྱ།།
རྫུན་མའི་ཁ་དེ་ཀུན་གྱིས་དོར་བར་བྱ།།

༢༠༡༨ལོའི་ལྷོ་ཁའི་རྩོམ་རིག་སྒྱུ་རྩལ་དུས་དེབ་དང་པོ་ནས་བཏུས།