༄༅། ། བོད་ཀྱི་ཆང་གཞས་ཁག་གཉིས།

དུས་ཚོད། 2019-03-28 རྩོམ་པ་པོ ཉི་མ་དོན་གྲུབ། རྩོམ་སྒྲིག

ས་གཞི་མ་གིར་གཟིགས་དང་།།

བཟང་པོ་གསུམ་གྱི་ཞལ་འཛོམས།།

གཅིག་ཏུ་དཀར་མོ་ནས་འབྲུ།།

གཉིས་སུ་ཁྱུང་དཀར་མཛོ་བོ།།

གསུམ་དུ་གཉའ་ཤིང་ཐོང་གཤོལ།།

བཟང་པོ་གསུམ་གྱི་ཞལ་འཛོམས།།

 

བཞུགས་གྲལ་ཡ་གིར་གཟིགས་དང་།།

བཟང་པོ་གསུམ་གྱི་ཞལ་འཛོམས།།

གཅིག་ཏུ་ཡབ་ཆེན་ཨ་ཕ།།

གཉིས་སུ་ཡུམ་ཆེན་ཨ་མ།།

གསུམ་དུ་བུ་དང་མནའ་མ།།

བཟང་པོ་གསུམ་གྱི་ཞལ་འཛོམས།།

 

ནམ་མཁའ་ཡ་གིར་གཟིགས་དང་།།

གཅིག་ཏུ་དྲོ་འཇམ་ཉི་མ།།

གཉིས་སུ་སྐལ་བཟང་ཟླ་བ།།

གསུམ་དུ་སྨལ་པོ་སྨིན་དྲུག།

བཟང་པོ་གསུམ་གྱི་ཞལ་འཛོམས།།

 

སྐྱེས་ཕོ་རབ་ཕོ་འབྲིང་ཕ་ཐ་གསུམ།།

སྐྱེས་ཕོ་རབ་ཆང་ཞིག་འཐུང་ཟེར་ན།།

སྐུ་ཟིལ་པ་ཕྲུམ་མེར་གཉིད་དུ་ཡུར།།

སྐྱེས་ཕོ་རབ་ཕོ་འབྲིང་ཕོ་ཐ་གསུམ།།

སྐྱེས་ཕོ་འབྲིང་ཆང་ཞིག་འཐུང་བའི་དུས།།

ཆང་ཁ་ཡིས་མི་འཐུང་བློ་ཡིས་འཐུང་།།

གླུ་གར་སེམས་སྐོར་གཏོང་ནས་སྡོད།།

སྐྱེས་ཕོ་རབ་ཕོ་འབྲིང་ཕོ་ཐ་གསུམ།།

ཕོ་ཐ་མ་ཆང་ཞིག་འཐུང་བའི་དུས།།

ཆང་ཁ་ཡི་མི་འཐུང་སྙིང་གིས་འཐུང་།།

སྙིང་ནག་རྩ་ནག་རྒྱས་ནས་སྡོད།།

གྲི་ནག་མདུང་ནག་འཇུས་ནས་སྡོད།།

ཙིར་རེ་འུར་རེར་འཁོན་ནས་སྡོད།།

བོད་ཀྱི་ཆང་གཞས་ཕྱོགས་བསྒྲིགསཞེས་པའི་སློབ་དེབ་ལས་བཏུས།