༄༅། ། རྒྱལ་ཁམས་བསྐོར་བའི་སྣང་ཚུལ།

དུས་ཚོད། 2020-05-18 རྩོམ་པ་པོ ཉི་མ་དོན་གྲུབ། རྩོམ་སྒྲིག དགེ་འདུན་ཆོས་འཕེལ།

ཞིང་ཆེན་སོ་སོས་བདམས་པའི་འཐུས་མི་ལས། །  

ཡིན་མིན་བརྟག་པའི་ཚུལ་བཞིན་འགྲིམ་བྱས་ནས། །

གང་ཞིག་མང་པོའི་ཕྱོགས་སུ་ཐག་གཅོད་པ། །

དབྱིན་ཇིའི་གཞུང་དང་མེ་གོའི་སྲོལ་ལུགས་ཉིད། །

ཡུལ་གྱི་ཡོང་འབབ་གཞུང་ས་ཁོ་ནར་དབང་། །

གཞུང་གི་དབང་ཐག་སྐྱེས་བུ་གཅིག་གིས་གཅོད། །

དེ་ཡི་བསྐོ་བཞག་འབངས་ཀྱིས་བྱེད་པ་དེ། །  

མི་དྲག་མཐོན་པོའི་རིགས་ཀྱི་སྡེ་ཚན་ལ། །

ཡོན་ཏན་ཚོད་ལ་དཔག་པའི་གྲལ་བྱས་ནས། །

རྒྱལ་ཁམས་སྤྱི་པའི་བྱ་གཞག་ཐག་གཅོད་པ། །

འདི་ནི་ཤར་ཕྱོགས་ཉི་མའི་ཁབ་ཀྱི་སྲོལ། །

ཕོ་ལུས་ཐོབ་ཚད་རྒྱལ་པོའི་གཡོག་པོ་སྟེ། །

མོ་ལུས་ཐོབ་ཚད་བཙན་པོའི་བཙན་མོ་ཉིད། །

ཡོད་ཚད་ཐམས་ཅད་རྗེ་ཡི་དཀོར་རྫས་ཡིན། །

ཙནྡྲ་ཤམ་ཤེར་མ་ཧཱ་ར་ཛའི་སྲོལ། ། (བལ་ཡུལ)

ཐམས་ཅད་ཁོང་དུ་སྦེད་པ་ཟབ་མོར་རློམས། །

ཀུན་ལ་དོགས་པ་ཟ་བ་གྲུང་པོར་བྱེད། །

རྙིང་པ་ཐམས་ཅད་ལྷ་ཡི་སྲོལ་དུ་བསྒྲགས། །

གསར་བ་ཐམས་ཅད་བདུད་ཀྱི་འཕྲུལ་དུ་སེམས། །

ངོ་མཚར་ཕལ་ཆེར་ཐན་ལྟས་ཉིད་དུ་བསྒོམས། །

ཆོས་ཀྱི་རྒྱལ་ཁམས་ཏྲི་བྷོ་ཊ་ཡི་སྲོལ། །

འདི་ནི་ད་ལྟའི་བར་དུ་རང་རེའི་སྲོལ། །

ཀུན་ལ་ཕན་པའི་ངོ་མཚར་རྫས་འཕྲུལ་དང་། །

ཡོངས་ལ་གནོད་པའི་ལྟས་ངན་ཆོ་འཕྲུལ་གཉིས།  

ཤེས་རབ་རལ་གྲིའི་རྣོ་ཕྱོགས་རེ་རེའི་སྣེ།   

གཅིག་གི་ཟླ་བ་གཅིག་ཀྱང་སླེབས་པར་ངེས།