སྟོན་མཇུག་གི་རྨི་ལམ། 

ནོར་འཛིན་སྒེག་མོའི་པང་ཁར། །

མིག་ཟུང་ལན་གསུམ་འཕངས་པས། །

བདག་བློ་སྤང་ལྗོངས་སྟེང་དུ། །

སྤང་རྒྱན་མེ་ཏོག་བཞད་འོང་། །

སྤང་རྒྱན་ཡིད་ལ་བལྟམས་པའི། །

སྟོན་ཁའི་མཚན་མོ་ཞིག་ལ། །

བུ་ཆུང་ཁེར་འགྲོ་ང་རང་། །

རྨི་ལམ་མཚོ་མོར་ལྷུང་སོང་། །

དང་ཐོག་ཁང་ཆུང་མཐོངས་སུ། །

ཟླ་བའི་འོད་ཐིགས་ལྷུང་སྟེ། །

མུན་པའི་ཡོལ་བ་ཕྱེ་སོང་། །

འོད་ཀྱི་ཐིགས་པ་དག་ནི། །

ང་ཡི་ཁང་ཆུང་ནང་དུ། །

དངུལ་གྱི་སྒྲོན་མེ་ཇི་བཞིན། །

དལ་བ་དལ་བུར་མངོན་བྱུང་། །

དེ་ནི་རྟེན་འབྲེལ་འགོ་མ། །

ལྷ་དར་ཞིག་གི་ཚུལ་རེད། །

མཚམས་དེར་སྦྲང་ཆར་བསིལ་མས། །

རི་ཀླུང་ཐང་གསུམ་སྦངས་སོང་། །

ཨ་ཇོའི་ཡིད་ཀྱི་ངོགས་སུ། །

མེ་ཏོག་མགོ་ལྕོག་ལྡེམ་ལྡེམ། །

རྩྭ་ལྗང་ཟིལ་པ་ཁྲོམ་ཁྲོམ། །

དབྱར་གཞུང་ལང་ཚོ་ཅན་པོ། །

ཡང་ནས་ཡང་དུ་འཆར་འོང་། །

དེ་མུར་སྦྲ་ཡི་ཆོན་ཐག །

གནམ་སའི་བར་དུ་འཐེན་ནས། །

ཨ་མ་འབྲོག་མོའི་འཇོ་དབྱངས། །

རྣ་བའི་སྒོ་ཁར་ལྷུང་ཡོང་། །

ཚུལ་འདི་སེམས་ལ་བབས་པས། །

མིག་མཐའ་མཆི་མས་བརླན་སོང་། །

ཨ་མའི་བྱད་གཟུགས་དྲན་ཚེ། །

ཨ་ཕའི་ཞལ་རས་དྲན་ཡོང་། །

བྱམས་ལྡན་ཕ་མ་བཞུགས་པའི། །

ཕ་ས་གཡང་གི་ར་བར། །

གཏན་དུ་སྡོད་རྒྱུ་བྱུང་ན། །

ཁོ་བོའི་སེམས་ཀྱི་རེ་བ། །

ལྗོན་པའི་རྩེ་ནས་སྨིན་འདྲ། །

གློ་བུར་གཡུ་འབྲུག་སྔོན་མོས། །

ངར་སྐད་ལན་འགའ་བསྒྲགས་པས། །

ཁོ་བོ་གཉིད་ལས་དཀྲོགས་བྱུང་། །

ངོ་མ་འདུ་བྲལ་བར་གྱི། །

གསང་བའི་མུ་ཏིག་རྡོག་པོ། །

སུ་དང་གང་གིས་མ་མཐོང་། །

སོ་སོའི་སེམས་ལ་བཏགས་ཡོད། །

གོམ་ཁ་མདུན་དུ་སྤོས་ནས། །

མིག་ཟུང་རྒྱང་དུ་གཏད་པས། །

གྲང་རླུང་འུར་འུར་ཞིག་གིས། །

དགུན་ཁ་ཤར་སོང་ཟེར་བྱུང་། །

ད་ནི་མི་ཡུལ་ཞིང་དུ། །

དཀར་གཙང་ཁ་བའི་མེ་ཏོག །

མགྲོན་ལ་ཕེབས་རན་ཡོད་ཨང་། །

                                    ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།