༄༅།། ལོ་ཙཱའི་མན་ངག་གཞོན་སྐྱེས་དགྱེས་པའི་དབྱངས་སྙན།

དུས་ཚོད། 2020-04-29 རྩོམ་པ་པོ ཉི་མ་དོན་གྲུབ། རྩོམ་སྒྲིག རིན་སྤུངས་ཉི་མ་དོན་གྲུབ།

    དམུ་རྒོད་འདུལ་དཀའི་འགྲོ་བ་འདི་དག་ལ།།  བཤད་པས་ཕན་ཐོགས་ཆེན་པོར་ག་ལ་འགྱུར།།  དེ་བས་དབེན་པ་བསྟེན་ནས་སྒྲུབ་པ་རེམས།།  རང་གཞན་གཉིས་ཀ་འཚེངས་པའི་ལམ་རྙེད་འགྱུར།།  ཞེས་པ་བདག་ཉིད་ཆེན་པོའི་གསུང་བཞིན་དུ།།  མཐོང་ཐོས་མཐའ་དག་བཏང་སྙོམས་འཇོག་བསམ་རུང་།  དུས་འདིར་ལོ་ཙཱའི་ཚ་རླབས་རབ་འཕྱུར་ཞིང་།། གྲུ་ཟུར་ཀུན་ནས་སྒྱུར་ཡིག་སྐར་ཚོགས་བཤམས།། མ་ཡིག་སྐད་ཀྱི་རྩོམ་པ་འཇའ་ལྟར་ཡལ།། སེམས་གཅོང་སྙིང་ཁ་འཁྲུག་པའི་ཆ་འདི་སྡུག། དེས་ན་བདག་ནི་མཁས་གྲལ་མིན་ན་ཡང་།།  འབད་དང་ལས་ལ་འཇུག་པའི་ཉམས་མྱོང་གིས།།  དྲིན་ལས་ཆེད་ལས་ཤེས་བྱ་ཕྲ་མོ་དང་།།  ཚིག་སྦྱོར་རྟགས་སུ་བཀོད་ཤེས་དཔའ་བློ་ཡིས།།  མིང་ཙམ་ལོ་ཙཱ་བ་ཡི་ཁྲལ་ཐོག་ནས།།  འདི་བཞིན་བརྩམས་ནས་སྒྲོག་པའི་བསྟན་དོན་འདི།།  བདག་དང་མཉམ་དང་གཞོན་སྐྱེས་ལོ་ཙཱ་བར།།  ཕན་པའི་རྒྱུ་རུ་གྱུར་ཅིག་མངྒ་ལཾ།། གངས་ཅན་ཡི་གེའི་བྱེད་པོ་ཐོན་མི་དང་།།  སྔ་དར་ལོ་ཆེན་བེེ་རོ་ཙ་ན་དང་།།  ཕྱི་དར་བླ་མ་རིན་ཆེན་བཟང་པོ་བཅས།།  གངས་ཅན་ལོ་ཙཱ་མཁས་པའི་ཞབས་ལ་གཏུགས།།  དུས་ཀྱི་ནམ་ཟླ་སྟོང་གི་བགྲང་བྱའི་ཁྲོད།། བདག་ཅག་ཕྱི་རབས་འབད་འབུངས་ཟད་པས་ན།།  ལོ་ཙཱའི་བྱ་གཞག་རླུང་འཚུབ་མར་མེ་འདྲ།།  སྔོན་བྱོན་མེས་པོར་ངོ་ཚའི་གདོང་རེ་གནོངས།།  གང་འདིར་བདག་གི་བློ་ཡིས་དཔག་ཚོད་ཀྱིས།།  གངས་ལྗོངས་གཞོན་སྐྱེས་ལོ་ཙཱའི་ཚོམས་ཆེན་ལ།།  འཕྲལ་ཕུགས་གཉིས་ལ་ཕན་ཞིག་གདགས་པའི་ཕྱིར།།  ལོ་ཙཱའི་ལམ་ལ་འཇུག་པའི་གཏམ་ཞིག་སྨྲ།།  དེ་ཡང་འཇིག་རྟེན་སྐད་དོད་ལོ་ཀ་དང་།།  མིག་གི་དོན་ལ་འཇུག་པའི་ཙཀྵུ་གཉིས།།  རྣམ་དབྱེའི་རྐྱེན་དང་བཅས་པ་སྲོག་ཞུགས་ནས།།  ལོ་ཙཱ་འཇིག་རྟེན་མིག་གི་སྐད་དུ་བྱ།།  ལོ་ཙཱའི་ལས་ནི་ཕབ་སྒྱུར་བརྒྱུད་རིམ་ཞིག།  དེ་ལ་རིགས་ཀྱི་དབྱེ་བ་གཉིས་སུ་ཕྱེ།།  དང་པོ་མ་ཡིག་གཞུང་ལ་གོ་བ་ལོན།།  གཉིས་པ་བུ་ཡིག་སྐད་ནས་བརྗོད་པར་བྱ།། ལོ་ཙཱའི་ལམ་དུ་འཇུག་པའི་སྐྱེ་བུ་ལ།།  མ་མཐར་སྐད་ཡིག་གཉིས་ལ་བྱང་པ་དགོས།།  དེ་ནས་མ་ཡིག་བུ་ཡིག་གཉིས་པོ་ཡི།།  འབྲེལ་ཡོད་ནང་དོན་ཀུན་ལ་རྒྱུས་མངའ་དགོས།།  དཔེར་ན་མ་ཡིག་ནང་ཆོས་ཡིན་པས་ན།།  ནང་པའི་ཆོས་ཀྱི་དོན་ལ་རྒྱུས་མངའ་དགོས།།  ཕབ་པའི་བུ་ཡིག་བོད་ཀྱི་ཡིག་ལམ་ནས།།  ཐོན་མིའི་སུམ་རྟགས་དང་བཅས་དག་ཡིག་ལ།།  མ་ནོར་མ་འཁྲུལ་བློ་ཡིས་དཔྱད་པ་དགོས།།  དེ་ནས་ལོ་ཙཱར་དངོས་སུ་འཇུག་པའི་སྐབས།།  མ་ཡིག་མགོ་ནས་མཇུག་བར་བལྟ་རྒྱུ་གལ།།  དེ་ཡི་ཞོར་ལ་ཚིག་མཁྲེགས་ཟུར་དུ་བཏོན།།  ཡང་ན་གོ་དཀར་རྟགས་ཤིག་བརྒྱབ་པས་ཆོག།  མཉམ་རུབ་ཚིག་མཛོད་འཚོལ་དང་གཞན་ལ་དྲི།།  གང་དགའ་གང་བདེས་དེ་རྣམས་ཐག་གཅོད་བྱ།།  སྐབས་འགར་ཐབས་ལམ་ཟད་ཀྱང་མ་ཤེས་ན།།  སྐབས་ཅིག་བཞག་ནས་མུ་མཐུད་ཀློག་པའི་ཚེ།།  ནང་དོན་ངང་གིས་རང་བཞིན་རྟོགས་པ་ཡོད།།  ཚིག་མཁྲེགས་གཅིག་ལ་དུས་ཚོད་མ་བརླག་ཅིག།  དེ་ནས་ཚིག་རེ་དུམ་རེ་བཟུང་ནས་བསྒྱུར།།  གོང་འོག་སྔ་ཕྱིའི་སྐད་ཆའི་འགྲོས་ལ་བསྟུན།།  དེ་ལྟར་མ་ཡིག་བསྒྱུར་བྱ་རྫོགས་པས་ན།།  མ་ཡིག་བལྟས་ནས་བུ་ཡིག་ཞུ་དག་བྱ།།  ནང་དོན་ཆད་དང་བསྒྱུར་ནོར་ཡོད་མེད་ལྟོས།།  དེ་ནས་མཐའ་མར་མ་ཡིག་ཡོངས་སུ་བསྐྱུར།།  བུ་ཡིག་སྐད་ཆའི་ཚིག་འགྲོས་ཁེར་རྐྱང་བཅོས།།  ལོ་ཙཱར་འཇུག་པའི་ཐོག་མའི་མནོ་བསམ་ལ།།  བུ་ཡིག་སྤྱོད་མཁན་ཞབས་ཞུའི་ཁ་གཏད་སོམས།།  དེ་ལ་དེ་བསྟུན་སྐབས་བབ་བརྡ་ཆད་སྤྱོད།།  འགྱུར་ཡིག་དོན་ལ་ཁ་གསལ་གོ་བདེ་འོང་།།  དེ་ནས་ལོ་ཙཱའི་རྩ་དོན་འཛིན་སྟངས་ཐད།།  བཙན་པོའི་དུས་ཀྱི་སྒྲ་སྦྱོར་བམ་གཉིས་ནང་།།  ནང་དོན་མ་འགལ་གང་བདེར་བསྒྱུར་དགོས་དང་།།  རྒྱལ་ཕྱི་རྒྱལ་ནང་ལོ་ཙཱའི་མཁས་པ་ཚོས།།  དོན་ལས་མི་འགལ་ཚིག་སྦྱོར་བདེ་བ་དང་།།  བརྗོད་བྱེད་ཚིག་གི་སྙན་འཇེབས་ལྡན་པ་དང་།།  མ་ཡིག་རྩོམ་ལུས་མ་འགྱུར་ཇི་བཞིན་སྒྱུར།།  དེ་བཞིན་ལུང་དང་རྩ་དོན་མང་དུ་ཡོད།།  དེ་དག་སྐབས་བབ་དུས་ལ་བསྟུན་གྱུར་ནས།། ལོ་ཙཱའི་ཐབས་ཀྱི་སྤྱོད་སྟངས་མི་འདྲ་ཡིན།། དེ་ཡང་འགའ་རེ་སྲིད་ཀྱི་དགོས་མཁོར་བབ།།  འགའ་རེ་ཆོས་ལུགས་བསྒྱུར་བའི་དགོས་མཁོར་བབ།།  འགའ་རེ་མི་རིགས་བསྒྱུར་བའི་དགོས་མཁོར་བབ།།  འགའ་རེ་སྐད་ཡིག་བསྒྱུར་བའི་དགོས་མཁོར་བབ།། འགའ་རེ་རིག་གནས་བསྒྱུར་བའི་དགོས་མཁོར་བབ།། དེས་ན་དོན་སྒྱུར་ཐད་སྒྱུར་རྩོད་གླེང་ངམ།། རང་འགྱུར་གཞན་འགྱུར་ཐབས་ཀྱི་རྩོད་པ་བྱུང་།། དོན་ལ་སྤྱི་ཚོགས་དངོས་ལ་གང་འཕྲོད་དང་།། དུས་ཀྱིས་དགོས་མཁོས་དགོངས་པ་གསུངས་པ་ལས།། འགྱུར་མེད་གཏན་འཇགས་འཛིན་ཞིག་ཡེ་ནས་མེད།། སྒྱུར་ལ་དབྱེ་ན་དོན་སྒྱུར་ཐད་སྒྱུར་དང་།།  སྒྲ་སྒྱུར་ལ་སོགས་རིགས་ཆེ་གསུམ་ཙམ་ཡོད།།  ཚིག་ཟིན་ནང་དོན་གཙོ་བོར་མི་འཛིན་པར།། བསྟན་བྱའི་སྤྱི་དོན་སྒྱུར་ནི་དོན་སྒྱུར་ཡིན།།  སྒྱུར་བྱའི་དོན་གྱི་ཚིག་ཟིན་ཇི་བཞིན་དུ།།  ཐད་ཀ་ཐད་སོར་སྒྱུར་ནི་ཐད་སྒྱུར་ཡིན།།  སྒྱུར་བྱ་གང་གི་སྒྲ་དོན་ཇི་ལྟ་བ།། སྒྱུར་བྱེད་སྐད་དུ་སོར་འཇོག་སྒྲ་སྒྱུར་ཡིན།། བྱེ་བྲག་ཐབས་ལ་སྣོན་འཕྲི་བཅོས་སྒྱུར་དང་།།  འགྲེལ་སྒྱུར་བགོ་སྒྱུར་སྒྲ་དོན་འབྲེལ་སྒྱུར་དང་།།  སྣོར་སྒྱུར་ལ་སོགས་རིགས་ཀྱང་འགའ་ཞིག་ཡོད།། དགོས་མཁོའི་དབང་གིས་ལེགས་པར་སྤྱད་ན་དགེ།།  སྒྲ་སྒྱུར་སྤྱད་ན་བོད་ཡིག་ཉམས་པ་མིན།། ལུགས་མཐུན་སྒྲ་སྒྱུར་བོད་ཀྱི་ཐ་སྙད་འཛོམས།།  དེ་ཡང་སྐད་ཡིག་འཕེལ་འགྱུར་ཆོས་ཉིད་ཡིན།།  རྩོམ་རིག་སྒྱུར་སྐབས་དོན་སྒྱུར་མང་དུ་བཀོལ།།  དེ་ཡི་ཞོར་ལ་ཚིག་རྒྱན་བརྒྱབ་ཚེ་ལེགས།།  ཁྲིམས་ལུགས་གཞུང་ལུགས་ཆབ་སྲིད་སྲིད་ཇུས་སོགས།།  གཞུང་ཕྱོགས་ཡིག་ཆ་ཐད་སྒྱུར་བྱས་ན་བཟང་།།  མི་མིང་དང་བཅས་ས་མིང་ལ་སོགས་དང་།།  མི་རིགས་གཞན་གྱི་འདོད་རྒྱལ་ཐ་སྙད་དང་།།  རང་ལ་སྔར་མེད་གོ་མིང་སྣ་ཚོགས་རིགས།། བོད་ལ་སྒྱུར་སྐབས་སྒྲ་སྒྱུར་བྱས་ན་བཟང་།།  ཐ་སྙད་གཅིག་ལ་ནང་དོན་རིགས་དབྱེ་གཉིས།།  བརྡ་ཆད་དེ་ཡི་ཡིག་ངོས་ནང་དོན་དག།  ཕལ་ཆེར་ཐད་སྒྱུར་བྱེད་དུས་སྤྱོད་པ་ཡིན།།  གཞན་ནི་དོན་ལ་བསྟུན་པའི་གབ་དོན་ཡོད།།  དེ་རིགས་ཚིག་གི་ཁོར་ཡུག་ལེགས་པར་ལྟོས།།  ཕར་ཆེར་དོན་སྒྱུར་བྱེད་སྐབས་སྤྱོད་པ་ཡིན།།  ལོ་ཙཱ་བྱེད་སྐབས་མཁྲེགས་འགྱུར་ཐ་སྙད་སྤོངས།།  ཀློག་པ་པོ་ཡིས་གང་དགའ་གང་བདེར་བསྒྱུར།།  སྔར་ཡོད་ཐ་སྙད་ཀུན་གྱིས་དོན་རྟོགས་ན།།  དེ་བཞིན་མི་སྤྱོད་ལོ་ཙཱ་བ་ཡི་འཁྲུལ།།  སྔར་ནས་ཡོད་རུང་དུས་ཀྱིས་བསྐྱུར་ཟིན་ན།།  རྙིང་ཞེན་བློ་ཡིས་གཞི་ནས་བསྔོག་དགོས་མེད།། བསྔོག་ཀྱང་བདག་ཅག་རྨང་གཞི་ཅུང་སྐྱོ་བས།། ཇི་བཞིན་འཕྲོད་ཅིང་སྤྱོད་པ་དཀའ་བས་ན།།  བརྡ་རྙིང་བརྡ་གསར་བར་ལ་འགལ་གཞི་འོང་།།  ཤེས་ལྡན་ཤེས་མེད་དབར་ལ་བར་ཞིག་ཆོད།།  དེ་དུས་སླར་ཡང་སྐད་ཀྱི་འཁྲུག་གཞི་ཡོང་།།   དེས་ན་རེ་གཉིས་དོར་རུང་བཅུ་ཕྲག་འོང་།། གཏོང་ཕོད་ལེན་ཕོད་ཁོང་ཡངས་རྒྱས་ཤོག་ཅིག། དེའང་དུས་བསྟུན་མཉམ་སྐྱོད་འཕེལ་ཕྱོགས་ཡིན།། གཞུང་ནས་བཀས་བཅད་བྱས་པའི་ཐ་སྙད་དག། ལོ་ཙཱའི་ཁྲོད་དུ་བེད་སྤྱོད་གང་མང་དགོས།། ད་ལྟ་གོ་བར་དཀའ་ཡང་མཇུག་ཏུ་གོམས།།  ག་ལེ་ག་ལེར་རང་རིགས་ཐ་སྙད་གྲུབ།།  བཀས་བཅད་ཐ་སྙད་འཕྲོད་དང་མ་འཕྲོད་དེ།། མ་མཐར་བཅུ་གྲངས་ལོ་ཡི་ཉམས་སད་ལས།། འཕྲལ་འཕྲལ་ཉིད་དུ་འགྲིག་མིན་བརྗོད་མི་རུང་།། བྱ་དངོས་གསར་པར་བོད་མིང་འདོགས་སྐབས་སུ།། ཐམས་ཅད་རྒྱ་ཡི་ཚིག་ཟིན་བཟུང་དགོས་མེད།། མི་རིགས་རང་གིས་བསམ་བློའི་འདུ་ཤེས་ལས།། ཇི་ལྟར་ངོས་སུ་བཟུང་བ་དེ་བཞིན་ཐོགས།།  དེ་ལས་འགལ་ཚེ་དམངས་དང་རིང་དུ་འགྲོ།།  སྤྱོད་སྒོ་མེད་ཅིང་ཕན་མེད་ཟུར་དུ་ལུས།།  དཔེར་ན་རྒྱ་ལ་七彩虹ཞེས་ཀྱང་།།  བོད་ལ་འཇའ་ཚོན་སྣ་ལྔར་བརྗོད་པ་ཡིན།། བྱ་དངོས་གཅིག་ལ་སྣ་བདུན་སྣ་ལྔའི་ཁྱད།།  རིག་གནས་འདུ་ཤེས་མི་འདྲ་ཉིད་ལས་བྱུང་།།  རྒྱ་བོད་སྐད་ཡིག་གཉིས་ལ་ཁྱད་པར་ཡོད།།  རྒྱ་བོད་སྐད་ཡིག་བརྡ་སྤྲོད་མཐུན་པ་མིན།།   རྒྱ་ཡི་ཚིག་དུམ་བྱ་ཚིག་སྔོན་དུ་འཇུག། བོད་ཀྱི་བརྡ་སྤྲོད་བྱ་ཚིག་རྗེས་སུ་འཇོག།  རྒྱ་ཡི་ཁྱད་ཚིག་ཚིག་དུམ་སྔོན་དུ་འགྲོ།།  བོད་ཀྱི་ཁྱད་ཚིག་ཕལ་ཆེར་རྗེས་སུ་འགྲོ།།  དུས་དང་ས་གནས་བྱེད་ཚུལ་སྟོན་པའི་(状语)ཚིག།  རྒྱ་ཡི་ཚིག་དུམ་གཙོ་ཚིག་སྔོན་དུའམ།། རྗེས་སུ་འཇོག་པ་ཇི་ལྟར་བྱས་ཀྱང་རུང་།། འོན་ཏེ་བོད་ལ་ཕལ་ཆེར་རྗེས་སུ་འཇོག། རྒྱ་ཡི་ཚིག་ལ་བརྡ་རྟགས་ཚིག་ཤད་མང་།།  བོད་ལ་སྐབས་བབ་གང་མཐུན་ཚིག་ཕྲད་སྦྱོར།། དེའང་རྒྱ་ཡིག་རྫོགས་རྟགས་(句号)བོད་སྒྱུར་སྐབས།།  རྫོགས་ཚིག་གོ་སོགས་ཆིག་ཤད་ལ་སོགས་དང་།།  སྐབས་བབ་དོན་བསྟུན་ཕྲད་སྦྱོར་སྣ་ཚོགས་ཡོད།།  རྒྱ་ཡི་ཚིགས་རྟགས་(顿号)བོད་སྒྱུར་བྱེད་པའི་དུས།། དོན་བསྟུན་དང་སྒྲ་འབྱེད་སྡུད་རྒྱན་སྡུད་དང་།། ལྷག་བཅས་ནས་སྒྲ་ནི་སྒྲ་ཅིང་སྒྲ་སོགས།། ཕྲད་ཀྱི་རིགས་དང་ཆིག་ཤད་སྦྱར་ཀྱང་ཆོག།  རྒྱ་ཡི་མཚམས་རྟགས་(逗号)བོད་སྒྱུར་བྱེད་པའི་དུས།།  དང་སྒྲ་འབྱེད་སྡུད་ཆིག་ཤད་སྦྱར་བས་ཆོག། ཕལ་ཆེར་མཉམ་སྒྲིག་མིང་དང་ཚིག་ལ་འཇུག།  གཞོན་སྐྱེས་ལོ་ཙཱས་ཚིག་མཛོད་ནོར་བུར་འཛིན།།  དོན་དུ་ཚིག་མཛོད་ཐ་སྙད་དཔྱད་གཞི་ཙམ།།  སྐབས་བབ་དོན་ལ་ཇི་ལྟར་ཕབ་དགོས་པ།།  རང་རང་རིག་པས་མ་དཔྱད་ནོར་ཉེན་ཆེ།།  ལེགས་བཤད་རྩོམ་གྱི་བསྒྱུར་བྱ་འཕྲད་སྐབས་སུ།།  ནང་དོན་མི་འགལ་ཐད་སྒྱུར་བྱས་ན་བཟང་།།  ཡིག་འབྲུ་མང་ཉུང་གཅིག་མཚུངས་བྱུང་ན་ལེགས།།  ལོ་རྒྱུས་རྩོམ་དང་རྣམ་ཐར་རྟོག་བརྗོད་སོགས།།  ཇི་མ་ཇི་བཞིན་ཐད་སྒྱུར་གཙོ་བོར་འཛིན།།  ཚིག་བཅད་ཚིག་ལྷུག་དཔྱད་ལུགས་སྤེལ་མ་དང་།།  བརྙན་འཕྲིན་རྒྱུན་མཐུད་འཁྲབ་ཚན་སྒྱུར་བྱ་དག། རྩོམ་ལུས་བཞིན་དུ་དོན་སྒྱུར་བྱ་བའི་ཐོག། རྩོམ་དང་མཐུན་པའི་སྙན་འཇེབས་ཅུང་ཙམ་དགོས།།  གསར་འགྱུར་རྩོམ་རིགས་སྒྱུར་བའི་བྱ་ཐབས་ཐད།།  ནང་དོན་བསྡུས་ལ་ཁ་གསལ་གོ་བདེ་དགོས།།  འགྲེམ་བརྡ་བརྡ་ཁྱབ་རྩོམ་རིགས་སྒྱུར་བའི་སྐབས།།  སྐད་ཆ་སྙན་ལ་གཞན་ཡིད་འགུག་པ་ཡི།།  སྒྱུ་རྩལ་རྣམ་པ་ལྷག་ཏུ་མངོན་པ་དགོས།། གཞུང་ཡིག་སྒྱུར་སྐབས་ཐད་སྒྱུར་གཙོ་བོར་འཛིན།། དོན་དངོས་རང་བཞིན་མིག་འབྲས་བཞིན་དུ་སྲུང་།། མ་ཡིག་ཚིག་ལས་མངོན་པའི་བསྟོད་སྨད་སོགས།། ཡིད་འགྱུར་རྣམ་པ་ཇི་བཞིན་ལེགས་པར་བསྒྱུར།།  མ་ཡིག་ཇི་བཞིན་ཚིག་ཐག་ཆོད་པོ་དང་།། དོན་གྱི་ལྕི་ཡང་ཇི་བཞིན་མཚོན་ནས་བསྒྱུར།།  བརྡ་རྙིང་ཡུལ་སྐད་ཚིག་རྒྱན་མངོན་བརྗོད་དང་།།  བསྟན་དོན་ཚོད་དཔག་འོབ་ཚོད་སྒྱུར་བ་དང་།།  རང་འདོད་སྣོན་འཕྲིའི་ཐབས་སོགས་སྤྱོད་པའི་རིགས།།  སྤོང་པའི་རིགས་སུ་འཇོག་པ་ཤེས་པར་བྱ།། རྒྱ་བོད་ལོ་ཙཱའི་བོད་ཡིག་གཅོད་མཚམས་ཐད།། ཚིག་རྐྱང་དབར་གྱི་འབྲེལ་བར་ཞིབ་ཏུ་ལྟོས།། སྔ་ཕྱི་གཉིས་ཀྱི་འབྲེལ་བ་དོ་མཉམ་ན།། དང་དང་ཆབས་ཅིག་དུས་མཚུངས་སྦྲགས་སོགས་སྦྱོར།། ཕྱི་མས་བསྟན་དོན་ཇེ་ཟབ་ཇེ་ཆེར་ན།།  བར་དུ་མ་ཟད་ཁར་དང་ཐོག་སོགས་སྦྱོར།།  ཕྱི་མས་མཇུག་འབྲས་ཇི་བཞིན་གསལ་འགྱུར་ན།།  ཚིག་རྐྱང་སྔ་མའི་རྗེས་སུ་མཐར་ཞེས་སྦྱོར།།   སྒོ་བྱང་སྒྱུར་སྐབས་མིང་ཙམ་བཏོན་པ་དང་།།  བྱེད་ནུས་གསལ་བྱེད་ཁྱད་ཆོས་བཏོན་པ་གང་།། ཇི་ལྟ་ཇི་བཞིན་སྒྱུར་གྱི་ཐབས་རྩལ་སྤྱོད།། གྲོང་སྐད་ཡིན་ན་ལྷ་སའི་སྐད་ཀྱང་སྤོངས།། སྤྱི་ལ་འཇུག་ན་རོང་འབྲོག་སྐད་ཀྱང་བསྡུས།། གོ་བདེ་ཡིན་ཟེར་ཁ་སྐད་ཐལ་ཆེ་ན།། བོད་ཀྱི་རྩོམ་རིག་གཞུང་ལ་ཕོག་ཐུག་ཡོད།། ཡིག་སྐད་ཡིན་ཟེར་ཚིག་མཁྲེགས་མང་དྲགས་ན།། སྒྱུར་གྱི་བརྡ་སྤྲོད་ཇེ་ནུས་ཤོར་ཉེན་ཡོད།། འགའ་རེས་མ་ཡིག་སྲུང་ལ་གཙིགས་སུ་བཟུང་།།  འགའ་རེས་བུ་ཡིག་བརྗོད་པ་གཙིགས་སུ་བཟུང་།།  སྔ་མ་གཞན་འགྱུར་ཐབས་ལ་དགའ་བ་དང་།།  ཕྱི་མ་རང་འགྱུར་བྱེད་ལ་རྩེན་པའི་ཁྱད།།  བརྩམ་བྱ་ནང་འདྲེན་བྱ་རྒྱུ་ལེགས་གྱུར་ཀྱང་།།  ཇི་བཞིན་འཕྲོད་པའི་མཐུན་སྦྱོར་ཨེ་འཛོམས་ལྟོས།།  རོ་མན་གྷི་རི་སི་ལ་སོགས་ཕྱི་རྒྱལ་དང་།། ཧན་དང་ཐང་སོགས་རྒྱ་ནག་ལོ་ཙཱ་དང་།། བཙན་པོའི་དུས་ཀྱི་བོད་ཀྱི་ལོ་ཙཱ་སོགས།། ནང་འདྲེན་མཐའ་དག་སྲིད་འབྱོར་རྒྱས་དུས་སྤེལ།། དེས་ན་རབ་ཏུ་འཕྲོད་པའི་སྐལ་བཟང་བྱུང་།། རྩོམ་རིག་གཉིས་ལ་བྱང་པའི་ལོ་ཙཱ་བས།། ཆེད་ལས་སྒྱུར་ལ་དེ་བཞིན་ནུས་པ་མིན།། བསྒྱུར་ནས་ཚིག་སྦྱོར་སྙན་པོར་གྲུབ་ནའང་།། བསྟན་དོན་གནད་ལ་འཁེལ་ལ་ཐེ་ཚོམ་ཡོད།།  དེས་ན་སྐད་གཉིས་སྨྲ་བའི་ལོ་ཙཱ་བར།།  ཤེས་རིག་ཀུན་ལ་མི་རྨོངས་ཡོན་ཏན་མཁོ།།  དེ་དོན་ཀུན་གྱིས་ཡང་ཡང་འབུངས་ཤོག་ཅིག།  ཅེས་ལོ་ཙཱའི་འཇུག་སྒོ་གཞོན་སྐྱེས་དགྱེས་པའི་དབྱངས་སྙན་ཞེས་པ་འདི་དབུས་ལྷ་ལྡན་ཞིང་ནས་སྦྱར་བ་དགེའོ།