༄༅། ། བོད་མིའི་དུར་འཇུག་དང་འདས་མཆོད་ལས་ས་ལ་སྦེད་པའི་སྐོར།
བོད་རིགས་ཀྱི་དུར་འཇུག་བྱེད་ཚུལ་ནི་ས་ལ་སྦེད་པ་དང་།
བྱ་གཏོར་དང་། ཞུགས་འབུལ་ཏེ་མེར་སྲེག་པ། དམར་གདུང་བཞེངས་པ།
ཆུར་སྐྱུར་བ་དང་ལྔ་ཡིན་པས་དེ་དག་གི་ནང་ནས་ས་ལ་སྦེད་པ་རོབ་ཙམ་བརྗོད་པར་བྱ་སྟེ།
བོད་ཀྱི་དུར་འཇུག་བྱེད་ཚུལ་སྔ་ཤོས་ནི་ས་འོག་ཏུ་སྦེད་རྒྱུ་དེ་ཡིན་ཏེ་བོད་ཀྱི་རྒྱལ་རབས་ལོ་རྒྱུས་དག་ལས་རྒྱལ་པོ་གྲི་གུམ་བཙན་པོའི་བང་སོ་ནི་བང་སོའི་ནང་གི་སྔ་ཤོས་དེ་ཡིན་པར་གྲགས་པ་དང་།
དེ་ཡང་རྒྱལ་པོའི་བང་སོའི་སྐོར་ཡིན་པ་ལས་དུར་རམ་བང་སོའི་སྔ་ཤོས་ནི་ཇི་ཙམ་ལ་བྱུང་བ་བརྗོད་པར་དཀའ་སྟེ་ཉེ་བའི་ལོ་ཤས་ནང་བརྙེད་པའི་བང་སོ་འགའ་ཞིག་ནི་ལོ་སུམ་སྟོང་ལྷག་སོང་ཟིན་སྐད་འདུག་ཅིང་གང་ལྟར་ནའང་བོད་དུ་ནང་པ་སངས་རྒྱས་ཀྱི་ཆོས་འདི་ས་ཁྱབ་རྡོ་ཁྱབ་མ་དར་བར་དུ་ནི་ཕུང་པོ་ས་འོག་ཏུ་སྦེད་རྒྱུ་དེ་ཁོ་ན་ཡིན་པར་ཐེ་ཚོམ་མི་དགོས་པ་ཞིག་ཡིན་ལ་སངས་རྒྱས་ཆོས་ལུགས་བོད་དུ་དར་ནས་ཀྱང་ཡུན་རིང་པོ་ཞིག་གི་རིང་ལ་སྔར་མུས་སུ་བང་སོ་བརྩིགས་ནས་དུར་དུ་འཇུག་མུས་སུ་ཡོད་པ་དཔེར་ན་རྒྱལ་པོ་གླང་དར་མ་འུ་དུམ་བཙན་གྱི་སྐབས་སུ་ནི་སངས་རྒྱས་ཀྱི་ཆོས་ལུགས་དར་ནས་རྒྱལ་རབས་དྲུག་ཙམ་སོང་ཡང་ད་དུང་བང་སོ་བརྩིགས་མུས་སུ་ཡོད་པ་སྟེ་བོད་ཀྱི་རྒྱལ་རབས་ལོ་རྒྱུས་ལས་གླང་དར་ཀྱི་བང་སོ་ནི་བོད་ཀྱི་བཙན་པོའི་བང་སོ་མཐའ་མ་དེ་ཡིན་ལ་བོད་ཀྱི་བང་སོའི་མཐའ་མའང་དེ་ཡིན་ཀྱང་ཕུང་པོ་ས་འོག་ཏུ་སྦེད་པའི་སྲོལ་གྱི་མཐའ་མ་ནི་མ་ཡིན་པར་བསྟན་པ་ཕྱི་དར་གྱི་དུས་བར་དུ་གནས་པར་སྣང་ངོ་།
དེ་ཡང་ཉེ་བའི་ལོ་འགའི་ནང་དུ་བརྙེད་པའི་དུར་སའམ་བང་སོ་རྣམས་ལ་གཞིགས་ན་འདས་པོ་དང་མཉམ་དུ་འདས་པོའི་རྟ་དང་མཚོན་ཆ་དང་རྒྱན་ཆ་སོགས་སྦས་པའི་དངོས་པོ་དེ་དག་འདས་པོ་དེར་བེད་སྤྱོད་བྱེད་དབང་ཡོད་པར་སྙམ་གྱི་ཡོད་པ་རེད།
དུས་ཕྱིས་སུ་ནི་སངས་རྒྱས་ཀྱི་བསྟན་པ་གཏིང་ཟབ་ཏུ་སོང་བའི་རྐྱེན་གྱིས་རྣམ་ཤེས་དང་བྲལ་ཟིན་པའི་ཕུང་པོ་ནི་སེམས་མེད་བེམ་པོའི་དངོས་པོར་གྱུར་ཟིན་པ་དེ་ལ་དུར་དངོས་མང་པོ་ཞིག་དང་ཆབས་ཅིག་འགྲོ་སོང་མང་པོ་ཞིག་གཏོང་བ་ནི་དགོས་མེད་དུ་མཐོང་ཞིང་།
བེམ་པོར་གྱུར་པའི་ཕན་མེད་ཀྱི་དངོས་པོ་དེའང་བྱ་དང་ཉ་སྦལ་སོགས་ཀྱི་ཟས་སུ་གྱུར་ན་དོན་དང་ལྡན་པར་བསམ་སྟེ་བསྐྱུར་བ་དང་བྱ་གཏོར་བྱེད་པའི་སྲོལ་དར་ནས་དུར་དུ་སྦ་བའི་སྲོལ་དེ་མེད་པར་གྱུར་ཟིན་མོད།
འོན་ཀྱང་དམིགས་བསལ་གནས་ཚུལ་འགའ་ཞིག་གི་འོག་ཏུ་རོ་ས་འོག་ཏུ་སྦ་དགོས་པ་དེ་འདྲ་ནི་དེང་སང་ཡང་ཡོད་པ་སྟེ་མཛེ་ནད་སོགས་འགོས་ནད་འཕོག་སྟེ་ཤི་བ་ནི་བྱ་གཏོར་བྱེད་མི་རུང་ལ་ཆུར་ཡང་བསྐྱུར་མི་རུང་བར་བཤད་དེ་རྒྱུ་མཚན་ནི་དེ་ལྟར་བྱས་ཚེ་བྱ་རྒོད་དང་ཉ་སོགས་ཀྱིས་བཟས་ན་དེ་ཚོར་གནོད་ཀྱི་ཡོད་པས་ཡིན་པ་དང་།
གཞན་ཡང་བྱིས་པ་ཆུང་ངུ་ལོ་བཅུ་གསུམ་མ་ལོན་པ་རྣམས་ནི་བྱ་གཏོར་བྱས་ཚེ་བྱ་མང་པོ་བབས་ནས་བྱའི་གྲོད་པ་མི་རྒྱགས་པས་ཆུར་སྐྱུར་དགོས་པ་ཡིན་ཀྱང་དམིགས་བསལ་གྱི་གནས་ཚུལ་ཏེ་མོ་རྩིས་སོགས་ལས་བྱིས་པ་འགའ་ཞིག་གི་ཕུང་པོ་ཁྱིམ་གྱི་སྒོ་ཕྱིར་བཏོན་ན་གཡང་ཤོར་བྱེད་པ་སོགས་རྒྱུ་རྐྱེན་སྣ་ཚོགས་ལ་བརྟེན་ནས་ཕྱིར་འདོན་མི་རུང་བ་དེ་འདྲའང་ཡོང་གི་ཡོད་པས་དེ་འདྲ་ཡོང་དུས་ཕུང་པོ་དེར་ཁ་ཆེ་ཤ་སྐམ་དང་ཚྭ་ཆུ་སོགས་སྨན་སྣ་བྱུག་སྟེ་ཁོག་མའི་ནང་དུ་བཅུག་ནས་ཁྱིམ་ཚང་དེ་གའི་ཁང་པའི་འོག་ཐོག་གི་རྩིག་ཟུར་དུ་རྩིག་པ་བརྒྱབ་ཏེ་སྦ་བའམ་ཕུང་པོ་བླུག་པའི་ཁོག་མ་འོག་ཐོག་གི་ཟུར་དུ་གདུང་མར་བཏགས་ནས་འཇོག་སྲོལ་ཡང་ཡོད་པ་རེད།
བོད་ལྗོངས་མི་དམངས་དཔེ་སྐྲུན་ཁང་ནས་བསྐྲུན་པའི་བོད་ཀྱི་ཡུལ་སྲོལ་རྣམ་བཤད་ཅེས་པའི་སློབ་དེབ་ལས་ཚན་བཤུས་བྱས།
