བཞི་པ། ད་ལྟའི་གནུབས་ཡུལ་གྱི་ངོས་འཛིན་དང་དེར་སྟར་ཆགས་ཀྱི་བང་སོ་ཐོན་ཚུལ།

(གཅིག)ད་ལྟའི་གནུབས་ཡུལ་གྱི་ངོས་འཛིན་བྱེད་སྟངས།

དུང་དཀར་ཚིག་མཛོད་ཆེན་མོ་ལས་གནུབས་ཡུལ་གླིང་དགུ་ནི་གཙང་གི་རོང་རིན་སྤུངས་ས་ཁུལ་དུ་ཡིན་ཞེས་དང་སྣུབས་རྗེ་སྲིས་པ་ནི་སྣུབས་ཡུལ་གླིང་དགུ་ཞེས་གཙང་རོང་ཁུལ་གྱི་རྒྱལ་ཕྲན་ཞིག་གི་རྒྱལ་པོ་ཡིན་ཞེས་འཁོད་ཡོད། ལོ་རྒྱུས་ཐོག་གི་གནུབས་ཡུལ་གླིང་དགུ་ཞེས་པ་དེའང་<<བོད་ཀྱི་གནའ་རབས་ཀྱི་ལོ་རྒྱུས་>>ལས། “སྣུབས་ཡུལ་གླིང་དགུ་ཞེས་བྱ་བའི་རྒྱལ་ཕྲན་འདིའི་མངའ་འོག་ཏུ་ཚོ་སྐོར་རམ་གླིང་དགུ་ཡོད་ཅིང་། དེའི་རྒྱལ་པོ་སྣུབས་རྗེ་སྲིད་པ་ཡིན་པ་དང་བློན་པོ་རྨེའུ་དང་འབྲོ་གཉིས་ཀྱིས་བྱས་ཏེ་རྒྱལ་ཕྲན་ཕྱི་ནང་གི་བྱ་བ་སྣ་ཚོགས་བྱེད། དབང་འོག་ཏུ་བྲན་གཡོག་མང་ཞིང་། ལོ་རེའི་དུས་ཚིགས་རེའི་ནང་དུ་ཁྲལ་རེ་བསྡུ་བ་དང་། ཤ་ཁྲག་གི་འབྲེལ་བ་ཡོད་པ་རྣམས་ཕན་ཚུན་གཉེན་མི་བསྡེབས། དགྲ་བྱུང་དུས་དབང་འོག་གི་ཚོ་བའི་སྐྱེས་པ་རྣམས་དམག་དུ་འགྲོ་ཞིང་། ཚོ་བའི་རྗེ་བོ་རྣམས་དམག་ལ་འགྲོ་དུས་དམག་དཔོན་ཡིན་པ་དང་། དགྲ་ལས་རྒྱལ་ན་གཡུལ་ལས་ཐོབ་པའི་དངོས་པོ་རྣམས་རྒྱལ་ཕྲན་གྱི་རྗེ་བོར་འབུལ། རྒྱལ་ཕྲན་གྱི་རྗེ་བོས་གཡུལ་ལས་དཔའ་བ་རྣམས་ལ་དཔའ་དར་འཐེན་ནས་གཟེངས་བསྟོད་བྱེད་ཅིང་། དམག་དཔོན་ལ་བཟུང་དམག་རྣམས་བྲན་གཡོག་ཏུ་སྟེར་བ་དང་དམག་མི་རྣམས་ལ་ཕྱུག་དང་གོ་མཚོན་གོས་གསུམ་གྱི་བྱ་དགའ་སྟེར། དུས་ཆེན་གྱི་དུས་སུ་དམར་མཆོད་སྣ་ཚོགས་བྱས་ཏེ་ཡབ་མེས་ལ་རྗེས་དྲན་བྱེད་ཅིང་། སྐྱེས་པ་དང་བུད་མེད་རྣམས་ལྷན་དུ་འཛོམས་ཏེ་རྟ་རྒྱུགས་འགྲན་རྩལ་དང་གླུ་ལེན་གར་རྩེ་བཅས་བྱེད་བཞིན་ཉིན་ཞག་གཅིག་འཁྱོལ་བ་ནི་རྒྱལ་ཕྲན་དེའི་སྲོལ་ཡིན་པར་བཤད།”ཅེས་བཤད། གཙང་རོང་གནུབས་དེ་ད་ལྟ་རིན་སྤུངས་རྫོང་བྱེ་བ་ཤང་གནུབས་གྲོང་ཚོས་ལྟེ་བར་བྱས་པའི་གཙང་རོང་གི་ས་ཆར་ཡིན་པ་གདོན་ཟ་མི་དགོས་པ་ཞིག་འདུག་མོད་ཞིབ་པར་དཔྱད་ཚེ་<<དུང་དཀར་ཚིག་མཛོད་ཆེན་མོ་>>ལས། “སྣུབས་མཚོ་ནི་(ཡར་འབྲོག་གཡུ་མཚོ་)བོད་རང་སྐྱོང་ལྗོངས་སྣ་དཀར་རྩེ་རྫོང་ཁོངས་དཔལ་དི་ཆུས་ཡར་འབྲོག་གྲོང་ཚོའི་ཉེ་འདབས་སུ་ཡོད།སྔར་བོད་ཀྱི་རུས་རྒྱུད་ཁོངས་གནུབས་ཀྱི་རུས་རྒྱུད་ཚོ་པ་རྣམས་ས་གནས་དེར་སྡོད་ཀྱི་ཡོད་སྟབས་རུས་ཀྱི་མིང་ལ་ཡུལ་བཏགས་ཏེ་གནུབས་ཡུལ་གླིང་དགུ་ཞེས་ཆགས་པ་དང་།སྣུབས་ཀྱི་རིགས་རུས་ལས་བྱུང་བའི་སྔགས་པ་དང་མཁས་པ་མང་པོ་ཞིག་རོང་གི་སྣུབས་སུ་འཁྲུངས་བའི་ལོ་རྒྱུས་ཡོད།”ཅེས་པ་ལྟར་ན་གནུབས་ཀྱི་རུས་རྒྱུད་ཀྱི་ཆེས་ཐོག་མ་འཚོ་སྡོད་བྱེད་ས་ནི་ད་ལྟའི་ལྷོ་ཁ་ས་ཁུལ་སྣ་དཀར་རྩེ་རྫོང་ཡར་འབྲོག་གི་ཉེ་འདབས་སུ་ཡིན་པ་དང་བོད་ཀྱི་ལོ་རྒྱུས་ནང་གི་རུས་རྒྱུད་ཚོ་པ་གནས་སྤོ་བའམ་ཡུལ་གཞན་དུ་འགྲོ་བའི་གནས་ཚུལ་མང་དུ་ཡོད་པའི་དོན་དངོས་ལ་གཞིགས་ན།གནུབས་ཀྱི་རུས་རྒྱུད་དེའང་ཕྱིས་སུ་ཆོས་ལུགས་དང་ཆབ་སྲིད་གང་རུང་གིས་རྐྱེན་བྱས་ནས་མི་ཕལ་ཆེ་བ་ཤར་ཕྱོགས་ཀྱི་ད་ལྟའི་རིན་སྤུངས་རྫོང་ཕྱོགས་སུ་རིམ་གྱིས་གནས་སྤོས་བྱུང་ནས་གཙང་རོང་གནུབས་ཡུལ་ཞེས་ཡུལ་ལའང་རུས་ཀྱི་མིང་ཐོགས་པའི་གནས་སྤོ་ཤུགས་ཆེན་པོ་ཞིག་བྱུང་བར་སྙམ། ལོ་རྒྱུས་ཐོག་གནུབས་ཀྱི་རུས་ལས་མཆེད་པའི་རྒྱུད་པ་རྣམས་འཚོ་སྡོད་བྱེད་ཡུལ་ལ་“གཙང་རོང་གནུབས་”སམ་“གནུབས་ཡུལ་རོང་”ཞེས་འཁོད་ཡོད། དེ་ལྟར་ཡིན་ཚེ་ང་ཚོས་ཐོག་མར་“རོང་”ཞེས་པའི་ཐ་སྙད་དེར་དཔྱད་པ་ཞིག་བྱས་ན་དེ་ནི་དམའ་སའི་གཤོངས་ཀྱི་མིང་ངམ་ཡང་ན་ཞིང་ལས་ས་ཁུལ་གྱི་མིང་།ཡང་ན་ལུང་པ་ཁ་དབྲག་དོག་པོ་སོགས་ལ་གོ་བ་ཡིན། གཞན་ཡང་གཙང་ཁུལ་གྱི་དམངས་ཁྲོད་དུ་རོང་ཞེས་པ་ནི་རིན་སྤུངས་རྫོང་ལ་གོ་བ་ཞིག་ཡིན་པ་དེ་གར་འཚོ་་སྡོད་བྱེད་བཞིན་པའི་མི་སེར་ཀུན་གྱིས་ཤེས་བཞིན་ཡོད། དེང་སྐབས་རིན་སྤུངས་བྱམས་ཆེན་དགོན་ལ་ཡང་རོང་བྱམས་ཆེན་དགོན་ཞེས་བརྗོད་བཞིན་ཡོད། ད་ལྟའི་རིན་སྤུངས་རྫོང་ལ་རོང་སྟོད་དང་རོང་སྨད་ཞེས་དབྱེ་ཞིང་རོང་སྟོད་ནི་སྣ་དཀར་རྩེ་རྫོང་ཁོངས་ཀྱི་མཐའ་མཚམས་སུ་གནས་པའི་རན་པ་ཤང་དང་།དེ་ནས་བྲག་པ་ཤང་། བདེ་སྐྱིད་གླིང་ཤང་བཅས་ཀྱི་གཙོས་ས་ཆ་རྣམས་དང་རོང་སྨད་ནི་རིན་སྤུངས་ཤང་དང་ད་ལྟའི་གནུབས་ཡུལ་གནས་སའི་བྱེ་བ་ཤང་།སྨོན་ཤང་བཅས་ཀྱིས་གཙོས་པའི་ས་ཆར་བརྗོད་ཀྱི་ཡོད།དེས་ན་གནུབས་ཀྱི་རུས་རྒྱུད་རྣམས་འཚོ་སྡོད་བྱེད་པའི་ས་ཆ་དེ་ནི་ད་ལྟའི་གནུབས་གྲོང་ཚོ་གནས་སའི་བྱེ་བ་ཤང་ཙམ་མིན་པར་སྣ་དཀར་རྩེ་རྫོང་ཡ་འབྲོག་ཉེ་འདབས་ནས་རིམ་བཞིན་ཕྱོགས་ཤར་ལ་གནས་སྤོ་བྱུང་ནས་ད་ལྟའི་རོང་སྟོད་རན་པ་ཤང་དང་། བྲག་པ་ཤང་།བདེ་སྐྱིད་གླིང་ཤང་། རོང་སྨད་རིན་སྤུངས་ཤང་། སྨོན་ཤང་། བྱེ་བ་ཤང་ཀྱི་གནུབས་གྲོང་ཚོ་བར་མཆེད་པ་ཞིག་མིན་ནམ་སྙམ། ཡུལ་ལུང་དེ་དག་ད་ལྟའི་སྣ་དཀར་རྩེ་རྫོང་ཡར་འབྲོག་ཁུལ་ནས་རིན་སྤུངས་རྫོང་གནུབས་གྲོང་ཚོ་བར་གཡས་གཡོན་རི་ལས་གྲུབ་ཅིང་ལུང་ཤུར་རོང་སར་སྟར་ཆགས་ཀྱི་གནས་ཡོད་པ་ཞིག་ཡིན།འོན་ཀྱང་དེའི་ནང་ད་ལྟའི་རིན་སྤུངས་རྫོང་གི་བར་ཐང་ཤང་དང་ཕུ་གསུམ་ཤང་སོགས་ཚུད་མེད་པ་ཞིག་ཡིན་པ་དེའང་ཤང་དེ་གཉིས་ཀྱི་ས་ཁོངས་ཕལ་ཆེ་བར་ལོ་རྒྱུས་ཐོག་གཡག་སྡེ་ཞེས་འཁོད་ཡོད་པ་ལས་གཙང་རོང་ངམ་གནུབས་ཡུལ་རོང་ཞེས་མིན། དེ་ལྟར་གནུབས་ཀྱི་རུས་རྒྱུད་རྣམས་གཙོ་བོ་འཚོ་སྡོད་བྱེད་ཁུལ་ནི་གོང་གི་ས་ཆ་དག་ཡིན་ཞིང་གཞན་ཡང་<<གངས་ལྗོངས་ལོ་རྒྱུས་ཐོག་གི་མི་སྣ་གྲགས་ཅན་>>ལས། “སྐྱོ་སྟོན་བྱང་ཆུབ་རིན་ཆེན་འདི་ཉིད་རབ་བྱུང་གཉིས་པའི་མེ་རྟ་(སྤྱི་ལོ་1126)ལོར་གྲོག་གི་མདའི་སྐྱོ་གྲོང་དུ་སྐུ་འཁྲུངས།དགུང་ལོ་བཅུ་གསུམ་ལ་ཕེབས་སྐབས་ཁྲོམ་བཞེར་རིན་ཆེན་སེང་གེ་དང་མཇལ། དགུང་ལོ་ཉེར་གཅིག་ལ་ཕེབས་སྐབས་བྱ་འདུལ་ལ་རབ་ཏུ་བྱུང་ཞིང་བསྙེན་པར་རྫོགས། སྙུག་རུམ་པ།འོད་འཇོ་བ།བྱ་ཡུལ་གྱི་སྣུབས་མཆོད་གནས་རྣམས་བརྟེན། དགུང་ལོ་ཞེ་དྲུག་པ་རབ་བྱུང་གསུམ་པའི་ལྩགས་ཡོས་(སྤྱི་ལོ་1171)ལོར་ཀམ་ཀམ་གྱི་གདན་སར་བྱོན། ཚོགས་པ་ཤས་ཆེ་བའི་སྐབས་བཙུན་པ་ལྔ་བརྒྱ་ཙམ་དུ་འཕེལ། རྒྱལ་ལྷ་ཁང་གི་གདན་ས་དང་སྦྲགས་ནས་མཛད། མཐར་དགུང་ལོ་དོན་ལྔ་པ་རབ་བྱུང་གསུམ་པའི་ལྩགས་སྤྲེལ་(སྤྱི་ལོ་1200)ལོར་སྐུ་གཤེགས།”ཡང་<<རྒྱ་བོད་ཆོས་འབྱུང་རྒྱས་པ་>>ལས་“གནུབས་ནམ་མཁའི་སྙིང་པོ་ནི་བེེ་རོ་ཙ་ནའི་རོང་ཁ་གསུམ་གྱི་སློབ་མའི་གྲས་ཀྱི་མོན་མོ་ཚ་བ་རོང་གི་ཡིན་”ཡང་<<གངས་ལྗོངས་ལོ་རྒྱུས་ཐོག་གི་མི་སྣ་གྲགས་ཅན་>>ལས། “གླང་ལུང་པ་བརྩོན་གྲུས་གཞོན་ནུ་འདི་ཉིད་ཡབ་སྣུབས་རྡོ་རྗེ་བཙན་གྲགས་དང་ཡུམ་ཧོར་གཟའ་མོ་གཉིས་ཀྱི་སྲས་སུ་རབ་བྱུང་གཉིས་པའི་ཆུ་ཡོས་སྤྱི་ལོ་1123ལོར་སྟོད་ལུང་ཚུར་གྱི་སྒང་རར་སྐུ་འཁྲུངས།”ཞེས་པ་དང་མདོ་སྨད་གཅན་ཚ་རྫོང་ཁོངས་སུ་ཡང་གནུབས་ཀྱི་རུས་རྒྱུད་ཀྱི་སྡེ་བ་ཞིག་ཡོད་པ་དེའི་མི་སེར་རྣམས་ཀྱིས་ཁོང་ཚོ་གནུབས་སངས་རྒྱས་ཡི་ཤེས་ཀྱི་རྒྱུད་པ་ཡིན་པར་བརྗོད་ཀྱི་ཡོད་པ་སོགས་ལ་བལྟས་ཚེ་གནུབས་ཀྱི་རུས་རྒྱུད་རྣམས་གཙང་རོང་གནུབས་ཙམ་མིན་པར་མཚོ་བོད་ས་མཐོའི་ཡུལ་གཞན་དུའང་མཆེད་ཡོད་པར་སྙམ།

ད་ལྟའི་རིན་སྤུངས་རྫོང་གནུབས་གྲོང་ཚོ་ནི་ལྷ་ས་ནས་རྒྱལ་ལམ་318བརྒྱུད་ནུབ་ཕྱོགས་སྤྱི་ལེ་185ཙམ་དང་གཞིས་རྩེ་ནས་རྒྱལ་ལམ་318བརྒྱུད་ཤར་ཕྱོགས་སྤྱི་ལེ་85ཙམ་གྱི་མཚམས་སུ་གནས་ཡོད།གནས་དེའི་བྱང་ཕྱོགས་མཚམས་སུ་གནུབས་ཁུ་ལུང་ཡོན་ཏན་རྒྱ་མཚོའི་འཁྲུངས་ཡུལ་ཡིན། དེའང་ད་ལྟའི་གནུབས་གྲོང་ཚོ་དང་ཆུ་མོ་ཡར་ཀླུང་གཙང་པོས་བཅད་པ་ཙམ་ལས་དོན་དངོས་ཐོག་གཅིག་ཏུ་སྦྲེལ་བ་ཡིན། ད་ལྟའི་གནུབས་གྲོང་ཚོ་དེ་རིན་སྤུངས་རྫོང་གི་ས་གནས་གཞན་དང་བསྡུར་ན་ཆུ་སྣ་དང་ཤིང་སྣ་འཛོམས་པ། ཡུལ་ལུང་གི་ཕུ་ལ་སྨན་ཆུ་དང་ནགས་ཀྱིས་ཁེངས་པ། ཕྱོགས་བཞིའི་རི་ཡི་འདབས་སུ་གྱང་རྙིང་དང་བརྩིགས་ཤུལ་རྙིང་པ་ཡང་མང་དུ་མཐོང་རྒྱུ་ཡོད་པས་ན་དེ་ཁུལ་ལ་སྔོན་ཆད་རྒྱལ་ཕྲན་ཞིག་ཆགས་པར་སོམས་ཀྱང་འཚོ་སྡོད་ཀྱི་ཁོར་ཡུག་བཟང་བ་ཞིག་ཏུ་གྲུབ་ནས་ཡོད། ལྷག་པར་དུ་ལོ་རྒྱུས་ཀྱི་དེབ་ཐེར་ནང་གནུབས་ཡུལ་གླིང་དགུ་རུ་གྲགས་པའི་གླིང་དགུ་དེ་ཡང་སྙིང་ཅི་ཞིག་དུ་ཡིན་མིན་གསལ་པོ་ཞིག་མ་རྟོགས་ཀྱང་ཡུལ་དེའི་རྒན་རབས་ཚང་མས་ད་ལྟའི་གནུབས་ཡུལ་ལ་ལུང་དགུ་ཡོད་པར་བརྗོད་ཀྱི་འདུག་པ་དེའང། ཆོ་ལུང་དང་ཐ་ལུང་། གྲ་ལུང་། གཡའ་ལུང་། བདུད་ལུང་། འཚོ་བ་ལུང་། སྐྱ་ལུང་། ཚ་རི་ལུང་། སྐམ་ལུང་བཅས་ཡིན་པ་གནས་དེའི་མི་ཚང་མས་ཤེས་བཞིན་འདུག གཞན་ཡང་བོད་ཀྱི་ལོ་རྒྱུས་རྣམས་བཞེད་པ་གཅིག་མཐུན་དུ་རྨུ་ཚ་སྒའི་མི་རྒྱུད་ནི་ཕྱུགས་སྐྱོང་བར་མཁས་ཤིང་ཕྱུགས་ལས་གཙོ་བོར་གཉེར་གྱི་ཡོད་པ་བཤད་ཡོད་པས་ན་གོང་གི་ད་ལྟའི་གནུབས་ཡུལ་གྱི་ལུང་དགུ་དེ་རྣམས་ཚང་མ་འབྲོག་སར་གནས་པ་དང་ཅུང་མཐུན་པ་ཞིག་འདུག ད་ལྟའི་གནུབས་ཡུལ་དུ་སྤྱིར་མི་རྣམས་ཀྱི་འཚོ་བ་དང་ཡུལ་སྲོལ་གོམས་གཤིས་གཙང་གི་ཡུལ་གཞན་དང་འདྲ་བར་གནས་ཀྱང་གནས་དེར་བོན་པོའི་རིག་གནས་ཀྱི་ཤུགས་རྐྱེན་ད་དུང་ཡང་ཤུགས་ཆེན་པོ་ཡོད་པ་དེ་ད་ལྟའི་གནུབས་ཀྱི་ཡུལ་མི་རྣམས་ཀྱིས་ལྷ་གསོལ་སྐབས་ཡིན་གཅིག་མིན་གཅིག་དམར་རྒྱན་ཞེས་ཤའམ་རྒྱུ་མ་འཁྱེར་ནས་ལྷ་གསོལ་སར་ཟ་བ་དང་མེར་བཀྲགས་པ་སོགས་བྱེད་དགོས་ཀྱི་ཡོད། གལ་ཏེ་ཁྱིམ་ཚང་རེ་གཉིས་ལ་ཆ་རྐྱེན་གྱིས་དབང་གིས་དམར་རྒྱན་མེད་པས་ན་གཞན་ནས་གཡར་བ་སོགས་མ་བྱས་ཚེ་ཀུན་གྱིས་འཕྱ་བའི་གནས་སུ་འགྱུར་གྱི་ཡོད་འདུག ད་ལྟ་གནུབས་མདའ་གྲོང་ཚོར་སྨན་ད་ཞེས་པའི་དུད་ཁྱིམ་ཞིག་ཡོད་པ་དེ་ནི་ཡུལ་དེའི་བོན་པོ་བརྟེན་མཁན་ཁོ་ན་ཡིན་པ་དེའང་སྔོན་གྱི་ཤོད་སྲོལ་ལྟར་ན་སྔོན་དུས་དུད་ཁྱིམ་དེར་བོན་པོའི་བླ་མ་དགའ་ལྡན་ཁྲོ་རྒྱལ་ཞེས་བྱ་བ་ཞིག་འཁྲུངས་མྱོང་བར་གྲགས་ཤིང་ད་ལྟའི་རིན་སྤུངས་རྫོང་རྫོང་དཀར་གྲོང་ཚོའི་ཁུལ་དུ་ཁོང་གི་སྒྲུབ་ཕུག་ཡང་མཇལ་རྒྱུ་ཡོད་སྐད། སྤྱིར་ད་ལྟའི་རིན་སྤུངས་རྫོང་གི་ས་ཆའི་ཐོག་བོན་གྱི་ཆོས་ལ་དད་པ་རྩེ་གཅིག་ཏུ་བྱས་ནས་ནང་ཆོས་གྱི་བྱ་ལུགས་དང་བསྲེས་ནས་མི་བྱེད་མཁན་དུད་ཁྱིམ་དེ་མ་གཏོགས་མེད་པ་ཡིན་འདུག ད་ལྟའི་གནུབས་མདའ་གྲོང་ཚོ་དང་ཉེ་བའི་ནུབ་ཕྱོགས་སུ་རུ་ལག་གཡུང་དྲུང་གླིང་ཞེས་བོན་གྱི་དགོན་ཞིག་ཡོད།<<གངས་ཅན་གྱི་གནས་བཤད་ལམ་ཡིག་གསར་མ་>>ལས། “དགོན་དེ་ནི་སྟོན་པ་ཤེས་རབ་བོད་ལ་ཕེབས་སྐབས་ཞབས་བཅགས་སའི་གནས་ཡིན་པ་དང་བོད་རྒྱལ་མུ་ཁྲི་བཙན་པོའི་སྐབས་ལ་བོད་ལ་འདུལ་བའི་བསྟན་པ་དར་སའི་གནས་ཁྱད་པར་ཅན་ཡིན་པ། གཡུང་དྲུང་བོན་གྱི་གདན་ས་གོང་འོག་གསུམ་དུ་གྲགས་པའི་གདན་ས་འོག་ཅེས་པ་དེ་ཡིན།”ཞེས་འཁོད་པར་བལྟས་ན་དགོན་དེ་ད་ལྟ་རྣམ་གླིང་རྫོང་ཁོངས་སུ་མངའ་ཡོད་ཀྱང་གནུབས་གྲོང་ཚོར་སྦྲེལ་ནས་ཡོད་པར་གཞིགས་ཚེ་ས་གནས་དེ་ཁུལ་ལ་སྔོན་བཙན་པོའི་དུས་ནས་བོན་ཆོས་གཞན་དང་མི་འདྲ་བའི་དར་ཁྱབ་ཆེ་བ་ཡོད་པ་མངོན་ཐུབ། དགོན་དེ་ནས་གནུབས་སྨན་དའི་ཁང་ཁྱིམ་མདུན་གྱི་སྦྱར་སྡོང་ཆེན་པོ་ཞིག་ཡོད་པ་དེར་སྨན་བཟོ་ཆེད་ཀྱི་ཤིང་ལྤགས་འཐུ་བར་ཡོང་གི་ཡོད་པ་དང་ཉེ་རབས་མདོ་ཁམས་བོན་ཆོས་གྱི་སེར་སྐྱ་རྣམས་ཀྱང་དབུས་གཙང་དུ་ཕེབས་སྐབས་ཆེད་མངགས་གནུབས་སྨན་ད་ཞེས་པའི་དུད་ཁྱིམ་དེ་འཚོལ་ཞིང་ཡོང་ནས་ཁྱིམ་ཚང་གི་ཐབ་རྙིང་པར་མཇལ་ཁ་ཞུ་བཞིན་ཡོད་པ་དེའང་ཡུལ་མི་ཀུན་གྱི་ཁས་ལེན་པ་ཞིག་ཡིན་འདུག ཡང་<<རྦ་བཞེད་>>ལས། “སྣུབས་རྗེ་སྲིབས་པོས་ལྷ་སྙིང་རྗེ་མེད་པའི་གནུབས་ལྷ་ཐོན་དྲུག་ནི་གསོལ།བྱར་མི་བཏུབ་པའི་བོན་ཤིད་ནག་པོ་བཏང་བས།སྣུབས་ཀྱི་རྒྱལ་གཞིས་རླག་སྟེ་སྣུབས་འཁར་སྐྱ་མོ་དང་ཆས་ཏེ་བོད་ཀྱི་མངའ་རིས་སུ་འདུས་པ་ལགས་སོ།”ཞེས་འཁོད་པར་ལྟར་ན་ད་ལྟའི་གནུབས་ཡུལ་གྱི་ཕུ་རུ་གནུབས་ལྷ་སྙིང་པོ་ཞེས་བྱ་བའི་ལྷ་ཞིག་ཡོད་པ་དང་དེའི་མི་རིང་བའི་སར་བོན་པོའི་དགོན་དུ་གྲགས་པའི་གྱང་ཤུལ་རྙིང་མ་ཞིག་ཡོད་པས་ན་གནུབས་ལྷ་སྙིང་པོ་དེ་རྦ་བཞེད་ནང་འཁོད་པའི་གནུབས་ལྷ་ཐོན་དྲུག་ཡིན་མིན་གྱི་དོགས་གཞི་ཞིག་ཀྱང་བྱུང་། 

(གཉིས།)ད་ལྟའི་གནུབས་གྲོང་ཚོ་ལས་སྟར་ཆགས་ཀྱི་བང་སོ་ཐོན་པ།

དེའང་2010ལོར་གནུབས་ཀྱི་གླིང་སྨད་སྒ་དགུ་ཞེས་པའི་ས་ཆར་ཡུལ་དེའི་མི་རྣམས་ཀྱིས་བང་སོ་སྟར་ཆགས་སུ་གནས་པ་མང་དུ་མཐོང་ཞིང་དེ་དག་ནི་རྡོའི་སྐྱོར་དང་ཁེབས་བྱས་ཞིང་སྐུ་ཕུང་ཇི་ལྟར་བཞག་ཚུལ་རུས་པའི་་གནས་སྟངས་ལས་ཧ་ཅང་གི་གསལ་པོ་ཡོད་འདུག་ཀྱང་མང་ཚོགས་ལ་རིག་དངོས་ཀྱི་འདུ་ཤེས་དབེན་པས་ན་གོང་རིམ་ལ་སྙན་ཞུ་སོགས་མ་བྱས་པར་ལམ་བཟོའི་ཞོར་དུ་གཏོར་སྐྱོན་ཤུགས་ཆེན་བྱུང་ནས་རང་ཉིད་དེར་ཉམས་ཞིབ་ཏུ་འགྲོ་སྐབས་རུས་པ་ཙག་ཙིག་དང་བྲེད་ལྟར་སྐྱོར་བའི་རྡོ་ཕྲན་བུ་ལས་མཐོང་རྒྱུ་མིན་འདུག དེ་དོན་ལ་གནུབས་གྲོང་ཚོའི་གྲོང་དཔོན་དོན་གྲུབ་ལགས་ལ་བཅའ་འདྲི་བྱ་སྐབས་ཁོང་གིས་གསུངས་དོན་ལ་བང་སོ་ཁ་གྲངས་སུམ་ཅུ་ལ་ཉེ་བ་ཞིག་སྟར་ཆགས་སུ་མུ་སྦྲེལ་ནས་ཡོད་པ་དག་ལམ་བཟོ་བྱེད་པའི་ཁུལ་དུ་ཐོན་པ་ཞིག་ཡིན་པ་ལས་མི་རྣམས་ཀྱིས་ཆེད་མངགས་བརྔོག་པ་ཞིག་མིན་ཀྱང་སྐབས་དེའི་མཐོང་ཐོས་བྱུང་བའི་ཚོད་དཔག་ལྟར་ན་ས་གནས་དེ་གའི་སྟེང་འོག་ཀུན་ལ་འདི་ལྟ་བུ་མང་པོ་ཡོད་པའི་ཡིད་ཆེས་བྱེད་བཞིན་འདུག བང་སོ་དེ་རྣམས་ཀྱི་རྣམ་པ་ནི་རྡོ་གྲུ་བཞི་ནར་མོའི་དབྱིབས་ཀྱིས་དཀྱུས་ལ་རྡོ་རེའི་རིང་ཚད་ལ་རྨིད་0.6ནས་0.7བར་བྱས་པའི་རྡོ་བཞི་ནས་ལྔའི་བར་གྱིས་གྲུབ་པ་དང་ཞེང་ལ་རིང་ཚད་རྨིད་0.3ནས་0.4བྱས་པའི་རྡོ་གཅིག་ནས་གཉིས་ཀྱིས་གྲུབ་ཡོད་པ་དེ་དག་གི་ཐོག་ཚང་མ་རྡོ་ལེབ་ཀྱིས་ཁེབས་བྱས་པ་ཤ་སྟག་ཡིན་འདུག དེའི་ནང་གི་རུས་པའི་གནས་སྟངས་ལ་ཆ་བཞག་ན་འགའ་ཞིག་བཙོག་བུར་གནས་པ་དང་འགའ་ཞིག་ཁ་གནམ་ལ་བལྟས་ནས་ཉལ་བའི་ཚུལ་དུ་གནས་ཡོད་པར་གསུངས་བྱུང་། ཡང་དེ་ལས་སྤྱི་ལེ་ཕྱེད་ཙམ་གྱི་གླིང་བ་གྲོང་ཚོར་ལྩང་འཛུགས་བྱེད་སྐབས་ཀྱང་དེ་ལྟ་བུའི་བང་སོ་མི་ཉུང་བ་ཞིག་ཐོན་འདུག་པ་དེ་དག་གི་ནང་དུ་རྡོ་ཀྱོང་ཀྱོང་དང་རྫ་ཆས་མང་པོ་ཡོད་པ་ད་ལྟའི་གནུབས་རྒྱལ་གཞོང་གྲོང་ཚོའི་མང་ཚོགས་ཀྱིས་མཐོང་ཐོས་བྱུང་འདུག་ཀྱང་རང་ཉིད་གནས་དེར་འགྲོ་སྐབས་རུས་པ་རྩག་རྩིག་ལས་དུར་རྫས་རྩ་བ་ནས་བརྙེད་མ་བྱུང་། གོང་གི་བང་སོ་ཐོན་སའི་ཡུལ་དེའི་ས་མིང་“གླིང་སྨད་”“གླིང་བ་”ཞེས་པ་དེ་དག་ལ་“གླིང་”གི་སྐོར་འབྲེལ་ཡོད་པ་དེའང་ལོ་རྒྱུས་ཐོག་གི་གནུབས་ཡུལ་གླིང་དགུ་ཞེས་པ་དང་ཅུང་མཐུན་ལ་དེ་ནི་སྟབས་འཁེལ་བ་ཞིག་མིན་པར་ལོ་རྒྱུས་ཞིབ་འཇུག་བྱེད་པའི་དོན་སྙིང་ཆེན་པོ་ཡོད་པར་སྙམ། དེ་དོན་ལ་རང་ཉིད་ནས་བང་སོ་ཐོན་སའི་ས་གནས་དངོས་ཀྱི་འདྲ་པར་དང་དེ་བཞིན་བང་སོ་གནས་སྟངས་ཀྱི་རྣམ་པ་དང་བཅས་ཆེད་ལས་གནའ་རྫས་ཞིབ་འཇུག་མི་སྣར་འདྲི་ཞིབ་བྱེད་སྐབས་བང་སོ་དེ་རིགས་ཀྱི་དུས་ཚིགས་ནི་ཧ་ལམ་སྤྱི་ལོའི་སྔོན་ནས་དུས་རབས་དྲུག་པའི་བར་གྱི་དུར་རྡོ་སྒམ་མ་ཞེས་པ་དེའི་ཁོངས་སུ་གཏོགས་ཆོག་པ་དང་ཞིབ་ཕྲའི་ལོ་ཚིགས་རྫ་ཆས་ཀྱི་རིགས་དབྱེ་དང་ཚན་རྩལ་གྱི་བརྟག་དཔྱད་ལ་གཞིགས་དགོས་གསུངས་བྱུང་། འོན་ཀྱང་གནུབས་ཡུལ་གྱི་བང་སོ་དེ་དག་མང་ཚོགས་ཀྱིས་གཏོར་སྐྱོན་བྱས་པས་ན་ད་བར་གོང་རིམ་གྱིས་ཤེས་རྟོགས་མ་བྱུང་ཞིང་དེར་བརྟག་དཔྱད་གནང་མ་མྱོང་བ་ཞིག་ཡིན་འདུག

ལྔ་པ།བསྟན་པ་ཕྱི་དར་དུས་སུ་གནུབས་ཀྱི་རུས་རྒྱུད་སྐོར།

(གཅིག)བསྟན་པ་ཕྱི་དར་དུས་སུ་གནུབས་ཀྱི་རུས་རྒྱུད་ཀྱི་མི་སྣ་གྲགས་ཅན།

བསྟན་པ་ཕྱི་དར་གྱི་དུས་སུ་གནུབས་ཁུ་ལུང་ཡོན་ཏན་རྒྱ་མཚོས་རྗེ་བཙུན་མི་ལ་རས་པར་སེ་ར་མཛུབ་འཁྲིད་ཀྱི་གདམས་ངག་མཛད་པ་སོགས་གནུབས་ཀྱི་རུས་ལས་མཆེད་པའི་གསང་སྔགས་ཀྱི་མཁས་པ་མང་དུ་བྱུང་། དུས་རབས་བཅུ་གཅིག་པའི་དུས་སུ་གཙང་པ་རིན་ཆེན་ནམ་མཁའ་རྡོ་རྗེ་ནི་ཡབ་སྣུབས་ཨ་ལ་ལ་ཞེས་པའི་སྔགས་པ་ཆེན་པོ་ཞིག་དང་ཡུམ་རལ་རྒྱགས་ཟ་ལྩམ་མི་བྱ་བ་གཉིས་ཀྱི་སྲས་སུ་རབ་བྱུང་དང་པོའི་མེ་སྤྲེལ་ལོ་སྟེ་1077ལོར་གཙང་གི་གནུབས་ཡུལ་རོང་དུ་སྐུ་འཁྲུངས། རྔོག་ལོ་དང་གཉན་ལོ།བ་རི་ལོ་ཙྰ།ར་ལོ། བཙན་ཁ་བོ་ཆེ་སྟེ་བླ་མ་ལྔ་ཙམ་གྱི་ཞབས་ལ་གཏུགས།བཙན་ཁ་བོ་ཆེ་ལས་མདོ་སྡེ་རྒྱན་གསན་པས་ཚར་གཅིག་ལ་མཁྱེན། དེ་ནས་ཐུགས་དགོངས་སུ་རྒྱ་གར་དུ་བྱོན་ནས་མཁས་པ་གཅིག་གཉིས་ལ་གཏུགས་དགོས་སྙམ་ནས་བྱོན་པས་དིང་རིར་དམ་པ་དང་མཇལ།དམ་པ་བཞེངས་པ་དང་སྐབས་འཁེལ་བས་ཀུན་གྱིས་མི་དེ་བསོད་ནམས་ཆེ་ཟེར། དེ་ནས་བལ་ཡུལ་དུ་མུ་གེ་ཆེ་ནས་ཕྱིར་ལོག་ནས་སྐྱིད་ཤོད་དུ་བྱོན། ཡང་ཆོས་སྒོ་བ་རྡོ་རྗེ་ཡི་ཤེས་སྟེ་འབྲི་གུང་གི་གདན་རབས་བདུན་པ་འདི་ཉིད་སྣུབས་ནམ་མཁའི་སྙིང་པོ་དང་གནུབས་སངས་རྒྱས་ཡི་ཤེས་ཀྱི་རྒྱུད་ལས་རབ་བྱུང་བཞི་པའི་ཆུ་ལུག་སྟེ་སྤྱི་ལོ་1223ལོར་བལྟམས།གཅུང་རྡོ་རྗེ་གྲགས་པ་ལས་རབ་ཏུ་བྱུང་། འདི་ཉིད་དང་ཐོག་ཁ་བ་ལས་འབྲི་གུང་གི་ཆོས་རྣམས་གསན། མཚམས་བཅད་པ་རིན་པོ་ཆེ་དག་ཞིང་དུ་ཕེབས་ནས་བཅུ་གཉིས་རིན་པོ་ཆེ་དགུང་ལོ་ཕྲ་སྟབས། རྗེ་ཉིད་དགུང་ལོ་རེ་དྲུག་ལ་ཕེབས་པས་ན་ས་བྱི་སྤྱི་ལོ་1288ལོར་འབྲི་གུང་གདན་སར་མངའ་གསོལ། དེ་ནས་ས་འབྲི་མ་མཐུན་པར་རབ་བྱུང་ལྔ་པའི་ལྕགས་སྟག་ལོ་སྟེ་སྤྱི་1290ལོར་ས་སྐྱས་འབྲི་གུང་བཅོམས་པས་འབྲི་གུང་གླིང་ལོག་ཅེས་པ་བྱུང་། དེ་སྐབས་གླིང་རིན་པོ་ཆེ་སྐྱོབ་པས་བཞེངས་པ་བཀྲ་ཤིས་སྒོ་མང་། དབོན་དང་སྤྱན་སྔ་གྲགས་འབྱུང་གིས་བཞེངས་པ་སྒོ་མང་དང་རྟེན་གསུམ་བསམ་གྱི་མི་ཁྱབ་པ། གཅུང་རིན་པོ་ཆེས་བཞེངས་པའི་ལྷ་ཁང་ཆེན་མོ་སོགས་རྟེན་གྲངས་ལས་འདས་པ་མེར་བསྲེགས། དགེ་འདུན་མང་པོ་བཀྲོངས། ཆོས་སྐུ་རྡོ་རྗེ་ཡི་ཤེས་མཆོག་གིས་བཅུ་གཉིས་པ་རིན་པོ་ཆེའི་སྐུ་མཆེད་དང་། འབྲི་གུང་གི་ནང་རྟེན་ཁྱད་འཕགས་ཅན་འགའ་ཞིག་དང་བཅས་ཀོང་པོའི་ཕྱོགས་སུ་ཕེབས། སྐབས་དེར་འབྲི་གུང་གི་མི་སྡེ་ཕལ་ཆེར་ཡུལ་འཁྱར། ཁང་པ་ཐམས་ཅད་ཞིག་རལ་དུ་འགྱུར། ས་ཞིང་ཐམས་ཅད་འཇག་སྐྱར་སོང་བ་སོགས་དུས་མི་བདེ་བ་ཆེན་པོ་བྱུང་། དེ་ནི་བོད་དུ་བླ་མ་སྐྲུལ་སྐུའི་ཡང་སྲིད་ངོས་འཛིན་བྱེད་པ་ཐོག་མ་ཡིན་པར་གྲགས། དུས་རབས་བཅུ་གཅིག་པའི་ནང་དུ་བླ་ཆེན་དགོངས་པ་རབ་གསལ་གྱི་སློབ་མ་མཆོག་དྲུག་གི་ཡ་གྱལ་བསྣུབས་ལབ་ཤི་དཔལ་གྱི་དབང་ཕྱུག་བྱུང་། དུས་རབས་བཅུ་གཉིས་པའི་ནང་གཡའ་བཟང་དགོན་ཕྱག་བཏབ་མཁན་དང་གཡའ་བཟང་བཀའ་རྒྱུད་ཀྱི་སྲོལ་གཏོད་པ་བླ་མ་གཡའ་བཟང་ཆོས་རྗེ་ཆོས་ཀྱི་སྨོན་ལམ་མམ་གནུབས་འདུལ་འཛིན་པ་བྱུང་བ་སོགས་གནུབས་ཀྱི་རུས་ལས་མཆེད་པའི་གདོང་རུས་ཀྱིས་བསྟན་པ་ཕྱི་དར་གྱི་དུས་སུའང་མེས་པོའི་སྲོལ་བཟང་མ་ཉམས་གོང་འཕེལ་གྱིས་ཡོན་ཏན་ཀུན་ལ་ལེགས་པར་སྦྱངས་ནས་ཆོས་ཀྱི་རྗེས་འཇུག་པ་མཛད་བཞིན་ཡོད་པ་ལོ་རྒྱུས་ཀྱི་དེབ་ཐེར་ཁག་ནང་གསལ།

(གཉིས་)གནུབས་ཆོས་ལུང་དགོན་ནམ་གཙང་ཆོས་ལུང་ཚོགས་པ།

ད་ལྟའི་གནུབས་ཡུལ་དུ་གནུབས་ཆོས་ལུང་དགོན་ཞེས་པའི་གྱང་རུལ་ཞིག་ཡོད་པ་དེ་བསྟན་པ་ཕྱི་དར་གྱི་སྐབས་ཐོག་མར་ཁ་ཆེ་པཎ་ཆེན་ཤྰཀྱ་ཤྲི་ཡིས་ཆོས་རྒྱུད་ཕྱག་ལེན་མཛད་ཅིང་ཕྱིས་སུ་གཙང་པ་སྣམ་རྫོང་བྱང་སྟོད་ཤང་དུ་གནས་སྤོས་བྱས་ནས་སྤོས་གང་དགོན་དུ་བརྗོད་པར་གྲགས། ཁ་ཆེ་པཎ་ཆེན་ཤྰཀྱ་ཤྲི་ཡིས་སྤོས་གང་དགོན་གྱི་མཁན་པོ་མཛད་པ་དང་གྲ་བཞི་ཚོང་འདུས་ཚོགས་པ་དང་གྲ་ནང་རྒྱ་གླིང་ཚོགས་པ། སྣེ་གདོང་རྩེ་ཡི་ཚོགས་པ། གཙང་མྱང་སྟོད་ཆོས་ལུང་ཚོགས་པ་བཅས་བཞི་ཕྱག་བཏབ་ཅེས་པ་ལྟར་ན་སྤོས་གང་དགོན་དེ་ཡང་སྤྱི་ལོའི་དུས་རབས་བཅུ་གཉིས་པའི་ནང་བྱུང་བའི་དགོན་ཞིག་ཡིན་པ་དང་དེ་དོན་ལ་རང་ཉིད་ས་གནས་དངོས་སུ་ཕྱིན་ནས་གནུབས་ཡུལ་མདར་བཞུགས་པའི་རྒན་པོ་མཐའ་མཁས་ཤེས་རབ་ལ་བཅའ་འདྲི་བྱས་པར་ཁོང་གིས་གསུངས་དོན་ལ་གནུབས་ཆོས་ལུང་དགོན་ནི་སྤོས་གང་དགོན་གྱི་མ་དགོན་ཡིན་པར་གསུངས་པར་སོམས་ཚེ་གནུབས་ཆོས་ལུང་དགོན་དེ་སྤོས་གང་དགོན་ལས་ལོ་རྒྱུས་དུས་ཡུན་རིང་བ་ཧ་ཅང་གསལ་པོ་ཡིན་འདུག ད་ལྟ་གནུབས་ཆོས་ལུང་དགོན་ནི་གྱང་ཤུལ་ལས་མེད་ཀྱང་འདི་ལོ་དགུང་ལོ་89ལ་ཕེབས་པའི་རྒན་པོ་མཐའ་མཁས་དངོས་གྲུབ་ཀྱིས་དེ་སྔོན་ཆོས་ལུང་དགོན་གྱི་ཆེས་ཐ་མའི་དབུ་ཚད་གནང་བས་ཁོང་གི་དགོན་པའི་དཔེ་ཆའི་དྲན་ཤེས་ཙམ་ན་ཆོས་ལུང་དགོན་ལ་བྱང་སེམས་བསོད་ནམས་གྲགས་པ་དང་མཁན་ཆེན་གྲགས་པ་རྒྱལ་མཚན།འཇམ་དཔལ་དབྱངས་མགོན་རིན་ཆེན་རྒྱལ་མཚན་ཞབས། སྡོམ་མཚོན་མཆོག་འགྱུར་རྒྱལ་བ་ཕྱག་གནས་པ། བསོད་ནམས་དཔག་མེད་སོགས་མཁན་པོ་རིམ་ཐོག་དྲུག་ཅུ་ཙམ་ཡོད་པ་སྔོན་གྱི་དཔེ་ཆའི་ནང་གཟིགས་མྱོང་གསུངས། ད་ཆ་དཔེ་ཆ་དེ་མཇལ་རྒྱུ་མེད་ལ་གནུབས་ཆོས་ལུང་དགོན་གྱི་སྐོར་ལ་དེབ་ཐེར་སོགས་གང་ཡང་མི་འདུག བཤད་རྒྱུན་ལ་མ་དེབ་དཀར་ཆག་ཞིག་ཡོད་པ་དེ་སྔོན་སྤོས་གང་དུ་གནས་སྤོ་བྱེད་སྐབས་འཁྱེར་བར་བརྗོད་ཀྱང་རང་ཉིད་ནས་སྤོས་གང་དགོན་དུ་རྩད་ཞིབ་བྱེད་སྐབས་ད་ཡོད་དགེ་འདུན་གྱིས་རྩ་བ་ནས་རིག་མ་མྱོང་གསུངས་ནས་དཔྱད་གཞིར་མ་རག འོན་ཀྱང་རྒས་པོ་ཁོང་གིས་གསུངས་དོན་ལ་ཆོས་ལུང་དགོན་ནི་ཐོག་མར་རྙིང་མ་དང་དེ་ནས་ས་སྐྱ།དེ་ནས་དགེ་ལུགས་བཅས་སུ་འགྱུར་བ་དང་ཕྱིས་སུ་བོད་ས་གནས་སྲིད་གཞུང་གི་དབོན་པོའི་དགོན་དུ་འགྱུར་བར་གསུངས་བྱུང་། ཆོས་ལུང་དགོན་གྱི་ཕྱག་བཏབ་པའི་དུས་ཚོད་ནི་ས་སྐྱ་དགོན་དང་ཧ་ལམ་གཅིག་པ་ཡིན་པ་དང་ཕྱག་བཏབ་མཁན་ནི་མཁན་ཆེན་གྲགས་པ་རྒྱལ་མཚན་ཡིན་ཞེས་གསུངས་ཀྱང་དེ་སྐོར་ལ་འབྲེལ་ཡོད་ཡིག་ཆར་གཞིགས་ནས་ཕྱག་བཏབ་མཁན་སུ་ཡིན་གཏན་འཁེལ་གྱིས་ཚིག་ཐག་གཅོད་དཀའ་ཡང་དཔལ་ལྡན་ས་སྐྱའི་ཁྲི་པ་བཞི་པ་དང་ས་སྐྱ་གོང་མ་རྣམ་ལྔའི་ཡ་གྱལ་རྗེ་བཙུན་གྲགས་པ་རྒྱལ་མཚན་མིན་ནམ་སྙམ། གང་ལགས་ཞེས་ན་ཆོས་ལུང་དགོན་དེ་ཁ་ཆེ་པཎ་ཆེན་ཤྰཀྱ་ཤྲི་ཡིས་ཆོས་རྒྱུད་ཕྱག་ལེན་མཛད་ཅིང་ཕྱིས་སུ་གཙང་པ་སྣམ་རྫོང་བྱང་སྟོད་ཤང་དུ་གནས་སྤོས་བྱས་ནས་སྤོས་གང་དགོན་དུ་བརྗོད་པ་དང་ཁ་ཆེ་པཎ་ཆེན་ཤྰཀྱ་ཤྲི་ཡིས་སྤོས་གང་དགོན་གྱི་མཁན་པོ་མཛད་པ་དང་བོད་ཀྱི་ཚོགས་པ་བཞི་ཕྱག་བཏབ་ཅེས་དང་རྗེ་བཙུན་གྲགས་པ་རྒྱལ་མཚན་གྱི་སྐོར་ལ་<<གངས་ལྗོངས་ལོ་རྒྱུས་ཐོག་གི་མི་སྣ་གྲགས་ཅན་>>ལས། “ཁ་ཆེ་པཎ་ཆེན་གྱིས་ཉི་ཟླ་གཟའ་འཛིན་བྱུང་བར་ལུང་བསྟན་ཀྱང་ཉིད་ཀྱིས་རྩ་ལུང་ལ་གཟིར་བར་གཟའ་འཛིན་མ་བྱུང་བ་དང་། རྡོ་དྲིལ་ནམ་མཁའ་འཇོག་ནུས་ཤིང་རང་སྒྲ་འཁྲོལ་བ། མ་མགོན་ལྩམ་བྲལ་བྲན་དུ་འཁོལ་ནུས་པ་སོགས་ངོ་མཚར་བའི་མཛད་པ་ཤིན་ཏུ་མང་། རྗེ་འདི་རྟེན་དགེ་བསྙེན་ཡིན་ཡང་པཎ་ཆེན་ཤྰཀྱ་ཤྲིས་ཕྱག་མཛད། དགུང་ལོ་ཉེར་དྲུག་པ་རབ་བྱུང་གསུམ་པའི་ཆུ་འབྲུག་ལོ་1172ལོར་ས་སྐྱའི་ཁྲིར་ཕེབས། གདན་ས་ལོ་ཞེ་ལྔ་བསྐྱངས་ནས་དགུང་ལོ་དོན་གཅིག་པ་རབ་བྱུང་བཞི་པའི་མེ་གླང་ལོ་1217ལོའི་བོད་ཟླ་གཉིས་པའི་ཚེས་བཅུ་གཉིས་ལ་སྐུ་གཤེགས།”ཞེས་པ་སོགས་ལ་དཔྱད་ཚེ་ཁོང་རྣམ་གཉིས་བོད་ཀྱི་ལོ་རྒྱུས་ཐོག་བྱོན་པའི་དུས་ཚོད་ནི་དུས་རབས་བཅུ་གཉིས་པའི་དུས་འགོར་ཡིན་པ་གཅིག་མཚུངས་དང་ལྷག་པར་དུ་ལྷན་དུ་ཆོས་སྐྱོང་བའི་ལོ་རྒྱུས་ཡོད་པ་ཞིག་ཡིན་པས་ན་རྒན་པོའི་བཅའ་འདྲིའི་ནང་ཆོས་ལུང་དགོན་དེ་མཁན་ཆེན་གྲགས་པ་རྒྱལ་མཚན་གྱིས་ཕྱག་བཏབ་པ་ཡིན་གསུངས་བ་དེ་ཆོས་ལུང་དགོན་གྱི་ཆོས་རྒྱུད་མཛད་མཁན་པཎ་ཆེན་ཤྰཀྱ་ཤྲི་ཡི་མཛད་པ་དང་འབྲེལ་བློ་ཁོག་ཆེན་པོས་དཔལ་ལྡན་ས་སྐྱའི་ཁྲི་པ་བཞི་པ་རྗེ་བཙུན་གྲགས་པ་རྒྱལ་མཚན་ལ་ངོས་བཟུང་བ་ཡིན། རྗེ་ལོ་རས་ཀྱི་སློབ་མ་འཇམ་དབྱངས་མགོན་པོ་ཡང་ཆོས་ལུང་དུ་འདག་སྦྱར་མཛད་དེ་ཐུགས་དམ་ལ་བཞུགས་པའི་ལོ་རྒྱུས་ཡོད། ད་ཆ་ཆོས་ལུང་དགོན་གྱི་ཉེ་འདབས་སུ་སྐུ་འབུམ་མཆོད་རྟེན་གཉིས་མཐོང་རྒྱུ་ཡོད་པ་ལས་གཅིག་ནི་སློབ་དཔོན་རིན་པོ་ཆེས་བཞེངས་ཤིང་མཛད་བྱ་ཤིན་ཏུ་ཕུན་སུམ་ཚོགས་པ་དང་གཞན་ཞིག་ནི་སློབ་དཔོན་རིན་པོ་ཆེས་རྒྱ་གར་ནས་ཆུ་མོ་ཡར་ཀླུང་གཙང་པོར་བསྐུར་ཏེ་ད་ལྟའི་ཆོས་ལུང་དགོན་གྱི་ཁ་སྤྲོད་ཡར་ཀླུང་གཙང་པོའི་ངོགས་སུ་ཐོན་ནས་མི་ཞིག་གིས་སྒལ་པར་འཁྱེར་ནས་རིར་འཛེགས་སྐབས་ངལ་གསོ་བྱེད་མི་ཆོག་ཅེས་བཤད་ཀྱང་མི་དེས་ད་ལྟའི་ཆོས་ལུང་དགོན་གྱི་ཉེ་འདབས་སུ་ངལ་གསོ་བ་ན་གནས་དེར་ལུས་ཞེས་རྒན་པོ་རྣམ་གཉིས་ཀྱིས་གཅིག་མཐུན་དུ་གསུངས་བཞིན་འདུག

མཇུག་བསྡུ་བའི་གཏམ།

བོད་གནའ་རབས་གནུབས་ཀྱི་རུས་རྒྱུད་ནི་བོད་ཀྱི་རུས་ཆེན་བཞི་ཡི་ཡ་གྱལ་རྨུ་ལས་གྱེས་ཤིང་བོད་གདོད་མའི་དུས་ནས་མཚོ་བོད་ས་མཐོར་འཚོ་སྡོད་བྱེད་པའི་རྒྱལ་ཕྲན་ཞིག་ཡིན་པ་དང་ཕྱིས་སུ་གཉའ་ཁྲི་བཙན་པོས་དབང་དུ་འདུས་ནས་ཡབ་འབངས་རུས་དྲུག་ལ་བསྐོས་པ་ཞིག་ཡིན། གནུབས་ཀྱི་རུས་རྒྱུད་རྣམས་ཀྱིས་སྤུ་རྒྱལ་བཙན་པོའི་དུས་རིམ་དང་ལྷག་ཏུ་སངས་རྒྱས་བསྟན་པ་བོད་དུ་དར་རྗེས་གསང་སྔགས་ཀྱི་རྒྱུན་ལ་ཤིན་ཏུ་མཁས་པར་འགྱུར་ནས་རུས་རྒྱུད་ནང་ཡོན་ཏན་སྤེལ་བའི་སྲོལ་ཆགས་ནས་གནུབས་ཀྱི་རུས་ལས་མཆེད་པའི་ཆོས་ཀྱི་རྗེས་འཇུག་པ་མང་པོ་བྱུང་ཡོད། གང་ལྟར་ཀྱང་གནུབས་ནི་བོད་རང་གི་ས་སྐྱེས་རྡོ་སྐྱེས་ཀྱི་རུས་རྒྱུད་ཞིག་ཡིན་པ་མ་ཟད་རུས་ཆེན་བཞི་ཡི་གྱེས་མ་རུས་ཆུང་ཆེ་གྲས་འགའ་ཞིག་གི་ཁོངས་སུ་གཏོགས་པ་དང་དེ་ལས་མཆེད་པའི་གནུབས་ཀྱི་རུས་རྒྱུད་མཚོ་བོད་ས་མཐོའི་ས་ཕྱོགས་གང་སར་ཁྱབ་ཡོད་ལ་ད་ལྟའང་གནུབས་ཡུལ་ངོས་འཛིན་བྱ་རྒྱུ་ཡོད་པ་ཞིག་ཡིན།

༢༠༡༦ལོའི་<<ཀྲུང་གོའི་བོད་རིག་པ་ཞིབ་འཇུག་>>དུས་དེབ་བཞི་པ་ལས་ཚན་བཤུས་བྱས།