无障碍阅读 关怀版

༄༅། ། མངོན་བརྗོད་ཀྱི་ངོ་སྤྲོད་མདོར་བསྡུས།

དུས་ཚོད། 2020-05-18 རྩོམ་པ་པོ དུང་དཀར་བློ་བཟང་འཕྲིན་ལས། རྩོམ་སྒྲིག ཉི་མ་དོན་གྲུབ།

    ཤེས་བྱའི་ཆོས་རེ་རེ་ལ་མིང་གི་རྣམ་གྲངས་མང་པོའི་སྒོ་ནས་བརྗོད་པ་ཞིག་ལ་ཟེར། དཔེར་ན། ཉི་མ་ནི་ཡོངས་སུ་གྲགས་པའི་མིང་ཡིན་ཅིང་། དེ་མིན་ནམ་མཁའི་ནོར་བུ། སྲིད་པའི་སྒྲོན་མེ། པདྨའི་གཉེན་ཞེས་པ་སོགས་ཁྱད་ཆོས་དང་འདྲ་ཆོས་སོགས་ཀྱི་སྒོ་ནས་བཏགས་པའི་མིང་སུམ་ཅུ་ལྷག་ཙམ་ཡོད་པ་ལྟ་བུ་ནི་མིང་གི་་མངོན་བརྗོད། ལག་པ། ཟུང་། མིག་ཟེར་བ་ལྟ་བུ་གྲངས་གཉིས་ཀྱི་མངོན་བརྗོད་ཡིན་པ་སོགས་གྲངས་ཀྱི་མངོན་བརྗོད། འཕུར་འགྲོ་ཞེས་པ། མདའ་དང་། བྱ། ལྷ་སོགས་དོན་མང་པོ་ལ་འཇུག་པ་ནི་མིང་གཅིག་དོན་མང་ཡིན་པས་མངོན་བརྗོད་ཤེས་ན་མིང་ལ་མི་རྨོངས་ཟེར་བའི་རྒྱུ་མཚན་ཡང་དེ་ཡིན། ཞིབ་པར་ནི་སློབ་དཔོན་འཆི་མེད་སེང་གེས་མཛད་པའི{{མངོན་བརྗོད་འཆི་མེད་མཛོད}}དང་། དེའི་འགྲེལ་པ{{འདོད་འཇོའི་བ་མོ}}ཞེས་པ་རྒྱ་གར་སྐད་ནས་བོད་སྐད་དུ་བསྒྱུར་བ་ཡོད། གཞན་ཡང་བོད་ཀྱིས་མཁས་པས་མཛད་པ་དཔེར་ན། ཞཱ་ལུ་ལོ་ཙཱ་བ་ཆོས་སྐྱོང་བཟང་པོས་མཛད་པའི{{མངོན་བརྗོད་ལེགས་བཤད་གསེར་གྱི་ལྡེ་མིག}} དེའི་སློབ་མ་སྐྱོགས་སྟོན་རིན་ཆེན་བཀྲ་ཤིས་ཀྱིས་མཛད་པའི{{མངོན་བརྗོད་ཀྱི་བསྟན་བཅོས}} སྣར་ཐང་ལོ་ཙཱ་བས་སངྒ་ཤྲིའི{{མངོན་བརྗོད་གསེར་ཕྲེང་རོལ་པ}} དགེ་ཡེ་བ་ཚུལ་ཁྲིམས་སེང་གེས་མཛད་པའི{{མངོན་བརྗོད་མིང་གི་ཚོགས་གསལ་བར་བྱེད་པ་བློ་གསལ་རྣ་ཆ}} སྙེ་ཐང་བློ་བརྟན་བཞི་པས་མཛད་པའི{{ཚིག་གཏེར་གྱི་འགྲེལ་པ}} མཁྱེན་བརྩེ་ལོ་ཙཱ་བས་མཛད་པའི{{མངོན་བརྗོད་སྡེ་ཚན་བདུན་པ}} རིན་སྤུངས་ངག་དབང་འཇིགས་གྲགས་ཀྱིས་མཛད་པའི{{མངོན་བརྗོད་མཁས་པའི་རྣ་རྒྱན}}(འདི་དཔར་མའི་ནང་འགོ་མཇུག་བསྡོམས་ཡིག་ཕྲེང་སུམ་ཅུ་ལྷག་ཙམ་ཆད་སྐྱོན་བྱུང་འདུག) དངུལ་ཆུ་དྷརྨ་བྷ་དྲས་མཛད་པའི{{མངོན་བརྗོད་རྒྱ་མཚོའི་ཆུ་ཐིགས}}དང་གྲངས་ཀྱི་མངོན་བརྗོད་སོགས་ཡོད།