༄༅། ། རྒྱའི་གནའ་བོའི་སྙན་ངག་བོད་འགྱུར་མ་ཁག་ལྔ།
མཚན་མོའི་ལྷིང་འཇགས་ཀྱི་དྲན་འཆར།
ལེ་པེ།(ཐང་རྒྱལ་རབས)
མལ་ཁྲིའི་མདུན་གྱི་ཁྲ་མར་ཟླ་འོད་འཕྲོ།
བ་མོས་ས་གཞི་བཀླུབས་པའི་འཆར་སྣང་ཞིག
ཡར་ལ་འདྲེན་བྱེད་ཟླ་བར་འཕེན་པས་ན།
རང་ཡུལ་དབང་མེད་དྲན་པས་མགོ་བོ་དུད།
དཀར་གསལ་ཟླ་བ་ནམ་ཞིག་འཆར།
སུའུ་ཧྥུའུ།(སུང་བྱང་མ)
དཀར་གསལ་ཟླ་བ་ནམ་ཞིག་འཆར་རམ་ལགས།།
བདག་གིས་ཆང་དཀར་བཏེགས་ནས་ནམ་མཁར་དྲི།།
ཨ་སྔོན་དགུང་གི་ལྷ་ཡི་ཕོ་བྲང་དུ།།
འདི་ལོ་དུས་ཀྱི་འཁོར་ལོ་ཇི་ཙམ་ཡིན།།
བདག་ནི་རླུང་གི་གཤོག་པའི་འཕུར་ལྡིང་ཐོག།
དག་ཞིང་ལྷ་ཡི་ཡུལ་དུ་ལོག་བསམ་ཀྱང་།།
གཡུ་དཀར་ལྷ་ཡུལ་ཕོ་བྲང་རབ་གྲང་བས།།
གདུང་བ་བཟོད་པར་དཀའ་བར་ཅུང་ཙམ་སྐྲག།
ལྷ་ཡི་ཡུལ་དུ་རང་དགའི་རྩེད་ལ་རོལ།།
ད་ལྟའི་མི་ཡུལ་འདི་དང་ཅི་ལ་འདྲ།།
ཟླ་འོད་བར་ཁྱམས་དམར་པོའི་གཡས་གཡོན་ལས།།
རིམ་གྱིས་ཁང་པའི་ཁྲ་མར་འཁྱུད་བཞིན་དུ།།
གཉིད་ཡེར་མི་ཡི་ལུས་ལ་ཤིན་ཏུ་འཕྲོ།།
ཟླ་བས་བདག་ལ་སྡང་སེམས་ཡོད་དམ་ཅི།།
སྐྱོ་གདུང་གཉེན་ཉེ་བྲལ་དུས་ལྷག་ཏུ་སྒོར།།
མི་ལ་དགའ་སྐྱོ་འདུ་བྲལ་ཆོས་ཉིད་དང་།།
ཟླ་བར་མུན་དངས་ཉ་རྒྱས་ཉ་གམ་ཡོད།།
བྲལ་བའི་མི་ལ་ནད་མེད་བདེ་ཐང་ཤོག།
ལེ་དབར་སྟོང་ནས་ཟླ་འོད་མཉམ་དུ་རོལ།།
དཔའ་མཛངས།
ཡུའེ་ཧྥེ།(སུང་རྒྱལ་རབས)
ཁོང་ཁྲོའི་མེ་ལྕེ་གནམ་ལ་འཕྱུར་ནས་མགོ་བོའི་ཞྭ་ཡང་ཕུད་ལ་ཉེ།
ཁེར་པོར་མཐོན་པོའི་རྭ་སྐོར་ལོགས་ནས་རྒྱང་རིང་ཕྱོགས་སུ་བལྟ་བའི་སྐབས།
དྲག་ཏུ་བབས་པའི་ཆར་པ་དེའང་མཚམས་འདིར་ཡོངས་སུ་ཆད་ནས་འདུག
རང་སེམས་གདུང་བའི་མགོ་བོ་བཏེགས་བཞིན་དབང་མེད་དབུགས་རིང་ཤོར་བཞིན་དུ།
རང་རྒྱལ་འདི་ལ་ལེགས་སྐྱེས་འབུལ་བའི་སྙིང་རྩ་དྲོན་མོ་ལྷག་ཏུ་འཕགས།
མི་ལོ་སུམ་ཅུའི་བགྲང་བྱའི་ནང་དུ་བྱས་རྗེས་ཅུང་ཙམ་གཏོད་ན་ཡང་།
དེ་དག་རྒྱལ་ཁབ་སྐྱོབ་པའི་བྱ་བར་རྒྱ་མཚོའི་ནང་གི་ཆུ་ཐིགས་བཞིན།
གཞི་ཁྱོན་ཆེ་བའི་ལྷོ་ནུབ་དམག་ནང་བདག་གི་མི་ཚེ་དགའ་སྐྱོས་ཁེངས།
ད་ནི་ང་ལ་སྙིང་རུས་ཡོད་ན་རྒྱལ་ཁབ་སྐྱོབ་པའི་དུས་ལ་བབས།
རྒས་ཤིང་འདས་པའི་ལངས་ཚོ་བསམ་ཚེ་ཐམས་ཅད་སྟོང་བར་ཤིན་ཏུ་ཕངས།
ཅིང་ཁང་ཟིང་ཆའི་དམག་འཁྲུག་ངོ་ཚ་ནམ་ཡང་བདག་གིས་བརྗེད་པར་དཀའ།
བློན་འབངས་ཁྲོ་ཞིང་སྡང་བའི་འཁུན་སྒྲ་ཡུན་རིང་འཇགས་པའི་ཐབས་ཤིག་མེད།
ང་ཡིས་དམག་གི་འཐབ་སར་བསྐྱོད་ནས་ཧ་ལན་རི་བོར་དཔུང་འཇུག་བྱེད།
ཧ་ལན་རི་བོ་དེ་ཡང་མི་ཞོག་སྙོམས་པའི་ཐང་དུ་གཏོང་ངེས་ཡིན།
ང་ཡི་བྲང་ཁ་དཔའ་ཡིས་ཁེངས་ཤིང་ལྟོགས་ཚེ་དགྲ་བོའི་ཤ་ཞིག་ཟ།
དམག་གི་འཐབ་སར་སྐོམ་པ་བྱུང་ཚེ་དགྲ་བོའི་དམར་ཁྲག་ཧུབ་ཀྱིས་འཐུང་།
སྔར་སོང་ཤོར་བའི་རི་ཀླུང་ས་གཞི་སླར་ཡང་དབང་དུ་བསྡུས་པའི་རྗེས།
རྒྱལ་ཁ་ཐོབ་པའི་གཏམ་བཟང་འཁྱེར་ནས་རྒྱལ་པོའི་དྲུང་དུ་སྙན་སེང་ཞུ།
སྐྱོ་གདུང་།
ལི་ཡུས།(ཐང་ལྷོ་མ)
དུས་ཀྱི་སྐོར་བ་ནམ་ཞིག་རྫོགས་སམ་འདས་པའི་ལོ་ཟླ་ཅི་ལ་ཟློག།
མདང་ནུབ་སླར་ཡང་དཔྱིད་རླུང་ལྡངས་དུས་ཕ་ཡུལ་དྲན་པས་ལྷག་ཏུ་སྐྱོ།།
ནན་ཐང་རང་ཡུལ་སྔར་བཞིན་གནས་ཀྱང་ས་སྐྱོང་ལས་དབང་ངར་མ་མཆིས།།
བདག་ལ་སྐྱོ་སེམས་དུ་ཙམ་མ་དྲི་ཤངས་ཤངས་རྒྱུགས་པའི་ཆུ་བོ་བཞིན།།
སྟོན་དུས་ཀྱི་དྲན་འཆར།
མ་ཀྲེ་ཡོན།(ཡོན་རྒྱལ་རབས)
ཡལ་འདབ་རེངས་པའི་ཤིང་རྒན་ཐོག་ལ་ས་སྲོས་ཕོ་རོག་ཚང་དུ་ཉལ།
ཟམ་ཆུང་འོག་གི་ཆུ་མོའི་གཞུང་ལ་ཐར་ཐོར་གྲོང་པ་རེ་གཉིས་ཙམ།།
གྲང་རླུང་ཁྲོད་དུ་གནའ་ལམ་བགྲོད་ཅིང་ཤེད་མེད་རྟ་རྒན་འཁྲིད་པའི་ང་།།
སྲོས་ཀྱི་ཉི་ཟེར་ཐང་དུ་བབས་ཀྱང་ལོག་པའི་ཡུལ་ཞིག་གང་དུ་ཡོད།།
རིན་སྤུངས་ཉི་མ་དོན་གྲུབ་ཀྱིས་བསྒྱུར།
༢༠༡༧ལོའི་《བོད་ཀྱི་རྩོམ་རིག་སྒྱུ་རྩལ》དུས་དེབ་གཉིས་པ་ལས་བཏུས།