<<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགན་བབ་སློབ་གསོའི་བཅའ་ཁྲིམས>>ལག་བསྟར་བྱེད་རྒྱུའི་བོད་རང་སྐྱོང་ལྗོངས་ཀྱི་བྱ་ཐབས། (ཚན་བཤུས།)
(1994ལོའི་ཟླ་2ཚེས་25ཉིན་བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་དྲུག་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བརྒྱད་པའི་ཐོག་གྲོས་འཆམ་བྱུང་བ།
2001ལོའི་ཟླ་11ཚེས་23ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བདུན་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་23པའི་ཐོག་དག་བཅོས་བྱས་པ)
དོན་ཚན་དང་པོ། རང་ལྗོངས་ཀྱི་རྨང་གཞིའི་སློབ་གསོ་གོང་འཕེལ་བཏང་ནས་སྤྱི་ཚོགས་རིང་ལུགས་ཀྱི་དངོས་པོའི་དཔལ་ཡོན་དང་བསམ་པའི་དཔལ་ཡོན་དར་རྒྱུར་སྐུལ་འདེད་གཏོང་ཕྱིར་<<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགན་བབ་སློབ་གསོའི་བཅའ་ཁྲིམསག>>གཞིར་བཟུང་བོད་རང་སྐྱོང་ལྗོངས་ཀྱི་དོན་དངོས་དང་ཟུང་འབྲེལ་གྱིས་བྱ་ཐབས་འདི་བཟོས་པ་ཡིན།
དོན་ཚན་གཉིས་པ། རང་སྐྱོང་ལྗོངས་ཀྱིས་ས་གནས་ཁག་གི་དཔལ་འབྱོར་དང་སྤྱི་ཚོགས་གོང་འཕེལ་འགྲོ་ཚུལ་ལ་གཞིགས་ནས་ཡུལ་བབ་དང་བསྟུན་ཏེ་ལོ་དགུའི་ལམ་ལུགས་ཀྱི་འགན་བབ་སློབ་གསོ་དེ་དུས་མཚམས་ཀྱི་དབྱེ་བ་དང་གོ་རིམ་ལྡན་པའི་སྒོ་ནས་ཁྱབ་གདལ་གཏོང་རྒྱུ།
ལོ་དགུའི་འགན་བབ་སློབ་གསོ་དེ་དམའ་རིམ་འགན་བབ་སློབ་གསོ་དང་དམའ་རིམ་འབྲིང་གྲས་ཀྱི་འགན་བབ་སློབ་གསོ(སྤྱིར་བཏང་དམའ་རིམ་སློབ་འབྲིང་དང་དམའ་རིམ་འབྲིང་གྲས་ཀྱི་ལས་རིགས་ལག་རྩལ་སློབ་གསོ་ཚུད)སྟེ་དུས་མཚམས་ཁག་གཉིས་སུ་དབྱེ་རྒྱུ་དང་། དམའ་རིམ་འགན་བབ་སློབ་གསོ་ཁྱབ་གདལ་གཏོང་བའི་རྨང་གཞིའི་ཐོག་དམའ་རིམ་འབྲིང་གྲས་ཀྱི་འགན་བབ་སློབ་གསོ་ཁྱབ་གདལ་གཏོང་རྒྱུ།
འགན་བབ་སློབ་གསོའི་རྩ་བའི་སློབ་ཡུན་ནི་དམའ་རིམ་སློབ་གསོ་ལོ་དྲུག་དང་འབྲིང་རིམ་དམའ་གྲས་ཀྱི་སློབ་གསོ་ལོ་གསུམ་ཡིན།
རང་སྐྱོང་ལྗོངས་མི་དམངས་སྲིད་གཞུང་གི་སློབ་གསོའི་གཙོ་འགན་འཁུར་མཁན་སྡེ་ཚན་གྱི་ཆོག་མཆན་ཐོབ་ཚེ་སློབ་ཡུན་ལམ་ལུགས་གཞན་དག་ལག་ལེན་བསྟར་བའམ་སློབ་ཡུན་ལམ་ལུགས་བསྒྱུར་བཅོས་ཀྱི་ཚོད་ལྟ་བྱས་ནའང་འགྲིག
འབྲོག་ཁུལ་དུ་དམའ་རིམ་འགན་བབ་སློབ་གསོ་ཁྱབ་གདལ་གཏོང་རྒྱུ་དེ་གོ་རིམ་དབྱེ་ནས་སྒྲུབ་ཆོག་ལ་དཀའ་ངལ་ཡོད་པའི་ས་ཁུལ་དུ་སྔོན་ལ་དམའ་རིམ་ལོ་གསུམ་འགན་བབ་སློབ་གསོ་ཁྱབ་གདལ་བཏང་ནའང་འགྲིག
དོན་ཚན་གསུམ་པ། འགན་བབ་སློབ་གསོ་ལག་བསྟར་བྱེད་སྐབས་རྫོང་རིམ་པའི་སྲིད་འཛིན་ས་ཁུལ་ཚན་པར་བྱས་ཏེ་སྤེལ་རྒྱུ་མ་ཟད།
ཤང(གྲོང་བརྡལ)ཁག་ལ་དོན་འཁྱོལ་ཡོང་བ་བྱེད་དགོས། རང་སྐྱོང་ལྗོངས་ཀྱི་འགན་བབ་སློབ་གསོའི་འཆར་གཞི་ནི་རང་སྐྱོང་ལྗོངས་མི་དམངས་སྲིད་གཞུང་ནས་བཟོ་རྒྱུ།
དོན་ཚན་བཞི་པ། འགན་བབ་སློབ་གསོ་སྤེལ་སྐབས་ངེས་པར་དུ་རྒྱལ་ཁབ་ཀྱི་སློབ་གསོའི་མཛད་ཕྱོགས་ཁྱོན་ཡོངས་ནས་ལག་ལེན་མཐར་ཕྱིན་བསྟར་རྒྱུ་དང་སློབ་གསོའི་སྤུས་ཚད་སྒོ་ཀུན་ནས་གོང་མཐོར་བཏང་ཐོག་སློབ་མ་ཡོངས་ལ་ཁ་ཕྱོགས་ཏེ་བྱིས་པ་དང་ལོ་ཆུང་རྣམས་ཀྱི་ཀུན་སྤྱོད་དང་།
ཤེས་རིག གཟུགས་པོ་བཅས་ཕྱོགས་ཡོངས་ནས་ཡར་རྒྱས་ཡོང་བ་བྱས་ཏེ་མི་རིགས་ཀྱི་བྱང་ཚད་མཐོ་རུ་གཏོང་རྒྱུ་དང་འབྲེལ།
ཕུགས་བསམ་ལྡན་པ་དང་། ཀུན་སྤྱོད་བཟང་བ། རིག་གནས་ཡོད་པ། སྒྲིག་ཁྲིམས་སྲུང་བ་བཅས་ཀྱི་སྤྱི་ཚོགས་རིང་ལུགས་འཛུགས་སྐྲུན་བྱེད་མཁན་ཤེས་ལྡན་པ་གསོ་སྐྱོང་བྱེད་ཕྱིར་རྨང་གཞི་འདིང་རྒྱུ།
དོན་ཚན་ལྔ་པ། རང་སྐྱོང་ལྗོངས་ཀྱིས་དམིགས་བསལ་གྱི་བྱ་ཐབས་སྤྱད་དེ་རང་སྐྱོང་ལྗོངས་ཀྱི་ཁོངས་སུ་ཡོད་པའི་མོན་པ་རིགས་དང་།
ལྷོ་པ་རིགས། འཇང་རིགས་སོགས་གྲངས་ཉུང་མི་རིགས་ཀྱི་སློབ་གསོའི་བྱ་གཞག་གོང་འཕེལ་གཏོང་རོགས་བྱས་ནས་མི་རིགས་དེ་དག་སྡོད་ཁུལ་དུ་འགན་བབ་སློབ་གསོ་ཁྱབ་གདལ་གཏོང་རྒྱུའི་གོམ་སྟབས་མགྱོགས་སུ་གཏོང་རྒྱུ།
དོན་ཚན་ཉི་ཤུ་པ། རང་སྐྱོང་ལྗོངས་ཀྱིས་བོད་ཀྱི་སྐད་ཡིག་ཐོག་ནས་སློབ་ཁྲིད་བྱེད་རྒྱུའི་མ་ལག་གཙོ་གྱུར་གྱི་བོད་རྒྱུ་སྐད་ཡིག་གཉིས་ཐོག་ནས་སློབ་ཁྲིད་བྱེད་པའི་མ་ལག་རིམ་པས་འཐུས་སྒོ་ཚང་དུ་གཏོང་རྒྱུ།
སློབ་གྲྭས་གྲངས་ཉུང་མི་རིགས་སྐད་ཡིག་ཡག་པོ་སློབ་རྒྱུའི་འགན་ལེན་བྱེད་དགོས་པ་དང་ཆབས་ཅིག་རྒྱའི་སྐད་ཡིག་ཀྱང་སློབ་སྦྱོང་ཡག་པོ་བྱེད་དུ་འཇུག་དགོས།
སློབ་གྲྭས་རྒྱའི་སྐད་ཡིག་བེད་སྤྱོད་བྱེད་ས་ཚང་མར་རྒྱལ་ཡོངས་གཅིག་གྱུར་གྱི་སྤྱོད་སྐད་དང་ཚད་ལྡན་གྱི་ཡི་གེ་ཁྱབ་གདལ་དང་བེད་སྤྱོད་བྱེད་རྒྱུ།
(བོད་རང་སྐྱོང་ལྗོངས་ཀྱི་ས་གནས་ཁྲིམས་སྲོལ་ཕྱོགས་བསྒྲིགས་)ལས་བཏུས།
རྩོམ་སྒྲིག་པ། གདུགས་དཀར་ཚེ་རིང་། སྐྱིད་ལུས།
