བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚད་མཐོའི་མཐོང་ཆེན་དང་ཡང་དག་པའི་འགོ་ཁྲིད་འོག རང་སྐྱོང་ལྗོངས་བོད་སྐད་ཡིག་ལས་དོན་ཨུ་ལྷན་གཞུང་ལས་ཁང་(རྩོམ་སྒྱུར་ཅུད)གིས་གྲངས་གཞིའི་བོད་ལྗོངས་འཛུགས་སྐྲུན་གྱི་འཐབ་ཇུས་དང་བསྟུན་ཏེ་བོད་སྐད་ཡིག་གྲངས་གཞི་ཅན་དང་ཆ་འཕྲིན་ཅན་ལ་མཁོ་བའི་ལས་སྟེགས་ཡངས་པོ་ཞིག་བསྐྲུན་རྒྱུར་པེ་ཅིང་སྦྲག་ཏར་སློབ་ཆེན་དང་མཉམ་འབྲེལ་ཐོག་“རྒྱ་བོད་ཐ་སྙད་འཚོལ་བཤེར་ལས་སྟེགས”ཞིབ་འཇུག་གསར་སྤེལ་བྱས་ཡོད།

རྒྱ་བོད་ཐ་སྙད་འཚོལ་བཤེར་ལས་སྟེགས་སྒོ་འབྱེད་མཛད་སྒོ་དེ་ཟླ་8ཚེས་18ཉིན་ལྷ་སར་སྐོང་འཚོགས་བྱས་པ་དང་། མིག་སྔར་ལས་སྟེགས་དེའི་ནང་ཚད་ལྡན་ཐ་སྙད་གསར་པ་ཁྲི་10ཡན་གྱི་གྲངས་མཛོད་ཅིག་ཆགས་ཡོད་ཅིང་། སྤྱིར་ན་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་གཞི་རྩའི་ཐ་སྙད་དང་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་ཏང་གི་གསར་གཏོད་རང་བཞིན་གྱི་རིགས་པའི་གཞུང་ལུགས་ཁྲོད་ཐོན་པའི་ཐ་སྙད་དང་ཚིག་དུམ་གསར་པ་བཅས་ཚུད་ཡོད་པས། རྒྱ་བོད་སྐད་གཉིས་ཀྱི་ཡིག་སྒྱུར་ལས་དོན་ལ་མཁོ་བའི་ཐ་སྙད་རྩ་བའི་ཆ་ནས་འདུས་ཡོད།

ལས་སྟེགས་དེ་ནི་སྐད་ཡིག་ལས་དོན་གྱིས་ཆ་འཕྲིན་ཅན་གྱི་དུས་རབས་གསར་པ་དང་། རྣམ་པ་གསར་པ། ལས་འགན་གསར་པ། བླང་བྱ་གསར་པ་བཅས་ལ་རང་འགུལ་གྱིས་འཚམ་ཐུབ་པར་བྱས་ཡོད་ལ་བོད་སྐད་ཡིག་གི་ཞབས་ཞུའི་ནུས་པ་དང་ཆུ་ཚད་མཐོ་རུ་གཏོང་བའི་བྱ་ཐབས་གསར་པ་ཞིག་ཀྱང་རེད། དུས་རབས་གསར་པ་ནས་བཟུང་རང་ལྗོངས་ཀྱི་ཐ་སྙད་གསར་པ་ཚད་ལྡན་བཟོ་བའི་ལས་དོན་དེ་གྲངས་གཞི་ཅན་དུ་རིམ་འགྱུར་འགྲོ་བའི་མཚོན་རྟགས་རང་བཞིན་གྱི་གྲུབ་འབྲས་གལ་ཆེན་ཞིག་ཀྱང་ཡིན།

ལས་སྟེགས་དེ་ཁྱབ་གདལ་བེད་སྤྱོད་བྱས་པ་དེས་རྒྱ་ཆེའི་རྒྱ་བོད་སྐད་གཉིས་ཀྱི་ཡིག་སྒྱུར་ལས་དོན་པར་མགྱོགས་མྱུར་དང་། དུས་ཐོག   ཚད་ལྡན་བཅས་ཀྱི་འཚོལ་བཤེར་བཀོལ་སྤྱོད་ཞབས་ཞུ་མཁོ་འདོན་བྱས་པ་མ་ཟད་གཞི་རིམ་གྱི་གྲོང་ཚོའི་ལས་བྱེད་པ་དང་ཞིང་འབྲོག་མང་ཚོགས་ཚོས་རྒྱལ་ཁབ་ཀྱི་སྤྱི་སྐད་སྦྱོང་རྒྱུར་རྒྱ་བོད་སྐད་གཉིས་ཀྱི་སློབ་སྦྱོང་ལས་སྟེགས་གསར་པ་བསྐྲུན་ཡོད།