རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་གཏོང་བ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟབ་ཏུ་གཏོང་ཆེད། རྒྱལ་ཡོངས་ཀྱི་སྤྱི་སྐད་ཁྱབ་གདལ་གཏོང་བའི་དྲིལ་བསྒྲགས་གཟའ་འཁོར་སྐབས་27པའི་དུས་དང་བསྟུན་ནས། 2024ལོའི་ཟླ་9ཚེས་20ཉིན་བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ཡོན་ལྷན་ཁང་གཞུང་ལས་ཁང་(རྩོམ་སྒྱུར་ཅུད)གིས<<སྤྱི་སྐད་བརྗོད་པ་ཆིག་སྟོང་མ>>རྒྱ་བོད་ཤན་སྦྱར་འགྲེམས་བསྒྲགས་དང་གཟིགས་འབུལ་མཛད་སྒོ་ལྷ་སར་སྤེལ་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དང་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ལྕགས་རྭ་བློ་བཟང་བསྟན་འཛིན་མཛད་སྒོར་ཞུགས་ཡོད། མཛད་སྒོའི་ཐོག་དང་ཐོག་ལྗོངས་བོད་སྐད་ཨུད་གཞུང་ལས་ཁང་(རྩོམ་སྒྱུར་ཅུད)གི་ཏང་ཙུའི་ཧྲུའུ་ཅི་གཞོན་པ་དང་ཀྲུའུ་རེན(ཅུད་ཀྲང་)ཟླ་བ་ཚེ་རིང་གིས<<སྤྱི་སྐད་བརྗོད་པ་ཆིག་སྟོང་མ>>རྒྱ་བོད་ཤན་སྦྱར་སྒྱུར་སྒྲིག་དཔེ་སྐྲུན་བྱས་ཚུལ་ངོ་སྤྲོད་བྱས་པ་དང་། དེ་རྗེས་ལྗོངས(ཀྲུང་དབྱང་)ཐད་གཏོགས་ཚན་པ་དང་། འབྲེལ་ཡོད་ས་གནས(གྲོང་ཁྱེར) རྫོང་(ཆུད) ཤང་(གྲོང་རྡལ) གྲོང་ཚོ(གྲོང་ལྷན) གྲོང་ཚོ་དང་དགོན་སྡེར་བཅའ་སྡོད་ལས་བྱེད་པ་བཅས་དང་། དེ་བཞིན་གཞི་རིམ་ཞིང་འབྲོག་མང་ཚོགས་ཀྱི་འཐུས་མིར<<སྤྱི་སྐད་བརྗོད་པ་ཆིག་སྟོང་མ>>དེབ་གྲངས་3000ལྷག་ཙམ་འགྲེམས་འབུལ་བྱས་པ་རེད། 

རྒྱལ་ཡོངས་ཀྱི་སྤྱི་སྐད་ཁྱབ་གདལ་གཏོང་བའི་དྲིལ་བསྒྲགས་གཟའ་འཁོར་སྐབས་27པའི་བརྗོད་བྱ་གཙོ་བོ་ནི“སྤྱི་སྐད་ཁྱབ་གདལ་ཤུགས་ཆེ་བཏང་ནས་སྟོབས་ཆེའི་རྒྱལ་ཁབ་ཀྱི་སྐད་བརྡའི་རྨང་གཞི་བརྟན་དུ་གཏོང་རྒྱུ”དེ་ཡིན། རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་གཏོང་རྒྱུ་ནི་རང་རྒྱལ་གྱི་གཞི་རྩའི་སྐད་ཡིག་གི་སྲིད་ཇུས་ཤིག་རེད་ལ། རྒྱལ་ཇུས་དམངས་འཚོ་དང་འབྲེལ་བའི་རྨང་གཞིའི་བྱ་གཞག་ཅིག་དང་། སྐད་ཡིག་བྱ་གཞག་གི་ལས་འགན་གཙོ་བོ་ཞིག་ཀྱང་ཡིན་པས། དེར་དངོས་ཡོད་ཀྱི་དོན་ཕན་ཆེན་པོ་དང་ལོ་རྒྱུས་ཀྱི་དོན་སྙིང་ཟབ་མོ་ལྡན་ཡོད། <<སྤྱི་སྐད་བརྗོད་པ་ཆིག་སྟོང་མ>>རྒྱ་བོད་ཤན་སྦྱར་དེ་པར་གཞིའི་ཐོག་ནས་འགྲེམས་བསྒྲགས་བྱས་པ་དེ་ཡང་རང་ལྗོངས་ཀྱི་བོད་སྐད་ཡིག་ལས་དོན་པས་ཀྲུང་གོ་གསར་པ་དབུ་བརྙེས་ནས་ལོ་ངོ་75འཁོར་བར་ཕྱག་རྟགས་ཕུལ་བ་ཞིག་རེད། <<སྤྱི་སྐད་བརྗོད་པ་ཆིག་སྟོང་མ>>དེ་བཞིན་སྤྱི་སྐད་ཐོག་མར་སྦྱོང་མཁན་ཞིག་གི་ངོས་ནས་བརྗོད་ན། ཡང་དག་པའི་རྩོམ་སྒྲིག་གི་ཕྱོགས་སྟོན་མཐའ་འཁྱོངས་ཀྱིས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་མཚོན་པ་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་དང་རྒྱུན་འཛིན་བྱས་ཡོད་པ་མ་ཟད། གཤམ་གསལ་གྱི་དགེ་མཚན་ཁག་ལྡན་ཡོད་པ་སྟེ།  གཅིག་ནས་རྩོམ་སྟངས་སྟབས་བདེ་བ། དེའང་བརྗོད་གཞི་ཆེན་པོ་དང་། དཔེ་རྣམ་ཆུང་བ། སྟབས་བདེའི་བརྗོད་པ་བཅས་གཞི་རྩའི་སྒྲོམ་གཞིར་བཟུང་ཡོད་པས། སློབ་སྦྱོང་དང་བེད་སྤྱོད་བྱེད་བདེ་པོ་ཡོད་པ། གཉིས་ནས་བརྗོད་བྱའི་ཡུལ་དང་བསམ་པའི་འཆར་སྒོ་ཟབ་མོ་ལྡན་པ། དེའང་འཚོ་བ་དང་། སློབ་སྦྱོང་། ལས་དོན་བཅས་ཀྱི་ཁྲོད་རྟག་ཏུ་མཐོང་ཐུབ་པའི་སྣང་ཚུལ་ལ་དམིགས་ཡོད་པས། རྒྱུན་དུ་སྤྱི་སྐད་སྤྱོད་པའི་དགོས་མཁོ་དང་མཐུན་ཡོད་པ། གསུམ་ནས་ཚིག་གྲུབ་སྦྱོར་སྟངས་སྟབས་བདེ་བ། དེའང་གཙོ་བོ་སྟབས་བདེའི་བརྗོད་པ་སྤྱད་ཡོད་པས། སྐད་ཡིག་སྦྱོང་བའི་ཆོས་ཉིད་དང་མཐུན་ཡོད་པ། བཞི་ནས་ཐ་སྙད་མང་ཉུང་རན་པ།དེའང་དེབ་འདིར་ཁྱོན་བསྡོམས་ཚིག་1028དང་ཡི་གེ་ཕལ་ཆེར་1400ཙམ་སྤྱད་ཡོད་ཐོག ཆེས་རྒྱུན་མཁོའི་རྒྱ་ཡིག་དང་ཐོན་རྟག་པའི་ཐ་སྙད་རྨང་གཞིར་བཟུང་ཡོད་པས། སློབ་སྦྱོང་གི་དཀའ་ཚད་རན་པོ་ཡོད་པ། ལྔ་ནས་སྐད་ཡིག་བེད་སྤྱོད་ཚད་དང་ལྡན་ཞིང་། བརྡ་སྤྲོད་ཡང་དག་པ། བརྗོད་བྱའི་ནང་དོན་ཁ་གསལ་བ། རྗོད་བྱེད་ཚིག་སྦྱོར་གནད་ལ་འཁེལ་བ་བཅས་ཀྱི་དགེ་མཚན་ལྡན་པས། རྒྱལ་ཁབ་སྤྱི་སྤྱོད་སྐད་ཡིག་ཁྱབ་གདལ་དུ་གཏོང་བའི་གཞི་རྩའི་བླང་བྱ་དང་མཐུན་ཡོད། 

འབྲེལ་ཡོད་ཚན་པ་ཁག་དང་མང་ཚོགས་ཀྱི་འཐུས་མིར<<སྤྱི་སྐད་བརྗོད་པ་ཆིག་སྟོང་མ>>འགྲེམས་འབུལ་གནང་བ་རེད།